جموں/۲۵ نومبر
لیفٹیننٹ گورنر‘ منوج سنہا نے منگل کے روز نوجوانوں سے کہا کہ وہ کشمیر وادی میں ریڈیکلسیشن میں ملوث تنظیموں اور افراد کے خلاف آگے آئیں۔
وہ جموں میں شعبۂ یوتھ سروسز اینڈ اسپورٹس اور اسکول گیمز فیڈریشن آف انڈیا (ایس جی ایف آئی) کی جانب سے منعقدہ ۶۹ویں نیشنل اسکول گیمز کی اختتامی تقریب سے خطاب کر رہے تھے۔
اپنے خطاب میں‘لیفٹیننٹ گورنر نے نوجوانوں سے کہا کہ وہ یکجہتی کے جذبے کو پروان چڑھائیں اور امتیاز سے پاک دنیا کی تعمیر کریں۔
‘لیفٹیننٹ گورنر نے کہا’’نوجوان کھلاڑی قوم کی تقدیر کے معمار ہیں اور وہ اس ملک کے سنہرے مستقبل کی تعمیر کے لیے قومی اتحاد کے جذبے کو فروغ دینے کے ذمہ دار ہیں۔ قومی اہداف کے لیے کام کرنے والی نوجوان توانائی معاشرے میں حرکیّت لاتی ہے‘‘۔
سنہانے تمام فاتحین اور شرکا کو مبارک باد پیش کی۔ انہوں نے ٹیموں کے مینیجمنٹ، کوچز اور عہدیداروں کو نیشنل اسکول گیمز کے کامیاب انعقاد پر دلی مبارک باد بھی دی۔
ایل جی نے نوجوانوں سے کہا’’بڑے خواب دیکھیں اور ان خوابوں کو حقیقت میں بدلنے کا حوصلہ رکھیں۔ رول ماڈلز کی حیثیت سے آپ معاشرے میں ایک خاص مقام رکھتے ہیں اور آنے والی نسلوں کو، میدان میں بھی اور میدان سے باہر بھی، متاثر کرنے کی بڑی ذمہ داری آپ پر عائد ہوتی ہے۔ کھیل کے میدان سے لے کر نچلی سطح تک، آپ کو کھیلوں کے ذریعے ترقی پسند پالیسیوں اور سماجی تبدیلی کی مسلسل کوشش کرتے رہنا چاہیے‘‘۔
‘لیفٹیننٹ گورنرنے فاتح ٹیموں اور دیگر نمایاں کارکردگی دکھانے والے کھلاڑیوں کو ٹرافیاں پیش کیں۔ انہوں نے محکمہ یوتھ سروسز اینڈ اسپورٹس کی ایک کمپینڈیم بھی جاری کی۔
ان کھیلوں میں فٹبال، ووشو، تائیکوانڈو اور ٹیبل ٹینس کے چار ڈسپلن شامل تھے، جن میں ملک کی۳۴ریاستوں اور مرکز کے زیرِ انتظام علاقوں سے کھلاڑیوں نے شرکت کی۔
محترمہ یاشا مْدگل، کمشنر/سیکریٹری یوتھ سروسز اینڈ اسپورٹس؛ محترمہ انورادھا گپتا، ڈائریکٹر جنرل یوتھ سروسز اینڈ اسپورٹس‘سینئر عہدیداران، نمایاں اسپورٹس شخصیات اور بڑی تعداد میں نوجوانوں نے اختتامی تقریب میں شرکت کی۔
ڈی آئی پی آر
