حکومت کاوادی کے اسکولوں میں فوری سرمائی تعطیلات کا اعلان

سرینگر/۲۵نومبر
محکمہ تعلیم نے منگل کے روز کشمیر اور جموں ڈویژن کے ونٹر زون میں واقع تمام سرکاری و تسلیم شدہ نجی اسکولوں کیلئے سرمائی تعطیلات کا باضابطہ شیڈول جاری کر دیا ہے ۔
جاری کردہ شیڈول کے مطابق پری پرائمری کلاسز۲۶نومبر۲۰۲۵سے۲۸فروری۲۰۲۶تک بند رہیں گی۔اسی طرح پہلی سے آٹھویں جماعت تک سرمائی تعطیلات یکم دسمبر۲۰۲۵سے۲۸فروری۲۰۲۶تک رہیں گی۔ جبکہ نویں سے بارہویں جماعت کیلئے تعطیلات ۱۱دسمبر۲۰۲۵سے۲۲فروری۲۰۲۶ تک مقرر کی گئی ہیں۔
محکمہ نے یہ بھی واضح کیا ہے کہ تعطیلات کے دوران تمام ٹیچنگ فیکلٹی کو کسی بھی تعلیمی مشن یا ضرورت کے لیے دستیاب رہنا ہوگا۔
مزید براں، تدریسی عملے کو۲۰فروری۲۰۲۶ تک اپنے اپنے اداروں میں واپس رپورٹ کرنے کی ہدایت دی گئی ہے تاکہ اسکولوں کے دوبارہ کھلنے کی تیاری کی جا سکے ۔
اعلامیے میں یہ انتباہ بھی شامل ہے کہ اگر کوئی سربراہِ ادارہ یا عملہ مقررہ سرمائی شیڈول کی خلاف ورزی کرتا ہے تو اس کے خلاف سخت کارروائی عمل میں لائی جائے گی۔
اس دوران وادی کشمیر میں خشک موسم کے بیچ شبانہ درجہ حرارت نقطہ انجماد سے مسلسل نیچے ریکارڈ ہونے کی وجہ سے ٹھٹھرتی سردیوں کا زور تھمنے کا نام ہی نہیں لے رہا ہے جس نے اہلیان وادی کو گوناگوں مشکلات سے دوچار کر دیا ہے ۔
کشمیر محکمہ موسمیات کے مطابق وادی میں جنوبی کشمیر کے پلوامہ اور شوپیاں اضلاع سرد ترین علاقے رہے ہیں جہاں کم از کم درجہ حرارت بالترتیب منفی۰ء۵ڈگری سینٹی گریڈ اور منفی۴ء۵ڈگری سینٹی گریڈ ریکارڈ ہوا ہے ۔
سیاحتی مقام پہلگام میں کم از کم درجہ حرارت منفی۴ء۴ڈگری سینٹی گریڈ جبکہ گلمرگ میں شبانہ درجہ حرارت منفی ۲ء۱ڈگری سینٹی گریڈ ریکارڈ ہوا ہے ۔
سرینگر میں کم از کم درجہ حرارت منفی۱ء۳ڈگری سینٹی گریڈ جبکہ سری نگر ہوائی اڈے پر شبانہ درجہ حرارت منفی۲ء۴ڈگری سینٹی گریڈ ریکارڈ ہوا ہے ۔
شمالی ضلع کپوارہ میں کم ازکم درجہ حرارت منفی۴ء۳ڈگری سینٹی گریڈ جبکہ گیٹ وے آف کشمیر کے نام سے مشہور قصبہ قاضی گنڈ میں کم ازکم درجہ حرارت منفی۰ء۳ڈگری سینٹی گریڈ ریکارڈ ہو ہے ۔
شمالی کشمیر کے بارہمولہ اور بانڈی پورہ اضلاع میں کم از کم درجہ حرارت باترتیب منفی۳ء۴ڈگری سینٹی گریڈ اور منفی۸ء۳ڈگری سینٹی گریڈ ریکارڈ ہوا ہے ۔
وسطی کشمیر کے بڈگام اور گاندربل اضلاع میں کم از کم درجہ حرارت بالترتیب منفی۷ء۳ڈگری سینٹی گریڈ اور منفی۴ء۲ڈگری سینٹی گریڈ ریکارڈ ہوا ہے ۔
مرکزی زیر انتظام علاقہ لداخ کے لیہہ اور کرگل اضلاع میں کم از کم درجہ حرارت بالترتیب منفی۵ء۸ڈگری سینٹی گریڈ اور منفی۸ء۸ڈگری سینٹی گریڈ ریکارڈ ہوا ہے ۔
محکمہ موسمیات کے مطابق وادی میں۱۰دسمبر تک موسم میں کسی بڑی تبدیلی کا کوئی امکان نہیں ہے ۔