جموں/۲۴نومبر
جموں کشمیر کے لیفٹیننٹ گورنر منوج سنہا نے پیر کے روز جموں کے سنجوان علاقے میں قائم جموں وکشمیر پولیس کے کمانڈو ٹریننگ سینٹر کا تفصیلی دورہ کیا، جہاں انہوں نے جاری خصوصی تربیتی کورسز، ماڈیولز اور آپریشنل تیاریاں کا جائزہ لیا۔
یہ دورہ ایک ایسے وقت میں ہوا ہے جب جموں و کشمیر میں سکیورٹی صورتحال کے پیش نظر تربیتی نظام کو مزید جدید خطوط پر استوار کرنے کی ضرورت پر زور دیا جا رہا ہے ۔
سرکاری ذرائع کے مطابق، ایل جی سنہا کو ٹریننگ سینٹر میں جاری کاؤنٹر ٹیرر آپریشنز، ٹیکٹیکل ایکشن، ہائی رسک آپریشنز، اور جدید اسلحے کے استعمال سے متعلق مختلف تربیتی مراحل پر جامع بریفنگ دی گئی۔ انہیں بتایا گیا کہ سی ٹی سی میں زیرِ تربیت اہلکاروں کو نہ صرف جنگی مہارتیں سکھائی جا رہی ہیں بلکہ انہیں ذہنی مضبوطی، جسمانی برداشت اور جدید ترین ٹیکٹیکل سوچ سے بھی لیس کیا جا رہا ہے ۔
دورے کے دوران لیفٹیننٹ گورنر نے ٹریننگ میں مصروف پولیس کمانڈوز سے بات چیت کی اور ان کی حوصلہ افزائی کرتے ہوئے کہا کہ جے کے پولیس نے گزشتہ برسوں میں نہایت مشکل حالات میں قابلِ ذکر قربانیاں دی ہیں اور ان کی پیشہ ورانہ مہارت پورے ملک میں سراہا جاتا ہے ۔ ایسے تربیتی مراکز سیکیورٹی ڈھانچے کو مزید مضبوط بناتے ہیں۔
اس موقع پر ایس ایس پی ٹریننگ اینڈ اسپیشل آپریشنز نے ایک مفصل پریزنٹیشن پیش کی، جس میں تربیت کے مختلف حصوں، دستیاب انفراسٹرکچر اور آئندہ کے توسیعی منصوبوں پر روشنی ڈالی گئی۔ انہوں نے سینٹر میں جدید ٹریننگ فیسلٹیز کے قیام، ٹیکٹیکل گراؤنڈ میں توسیع، اسلحے کی تربیتی سہولیات کی اپ گریڈیشن اور جدید ٹیکنالوجی کے انضمام سے متعلق تجاویز بھی پیش کیں۔
دورے کے دوران ایل جی سنہا کے ساتھ متعدد اعلیٰ افسران بھی موجود تھے ، جن میں ڈائریکٹر جنرل آف پولیس نالین پربھات، اسپیشل ڈی جی (کوآرڈینیشن) ایس جے ایم گیلانی، پرنسپل سیکرٹری ہوم چندرکر بھارٹی، اے ڈی جی پی ہیڈکوارٹر ایم کے سنہا، آئی جی پی جموں بھیم سین توٹی، ڈویژنل کمشنر رمیس کمار اور دیگر سینئر افسران شامل تھے ۔
ترجمان کے مطابق، لیفٹیننٹ گورنر نے سینٹر میں نظم و ضبط، تربیتی جذبے اور پیشہ ورانہ ماحول کی تعریف بھی کی اور امید ظاہر کی کہ یہاں سے تربیت یافتہ اہلکار ریاست میں امن و استحکام قائم رکھنے میں کلیدی کردار ادا کریں گے ۔ڈی پی آئی آر
