جموں/۲۲نومبر
منشیات فروشوں کے خلاف جنگ کو وسیع پیمانے پر جاری رکھتے ہوئے جموں پولیس نے چار منشیات فروشوں کو گرفتار کرکے ان کی تحویل سے ہیروئن جیسا ممنوعہ مواد، ایک پنچ کار اور ایک بلیٹ موٹر سائیکل بر آمد کی ہے ۔
ایک پولیس ترجمان نے بتایا کہ پولیس پوسٹ منوال کی ایک ٹیم کو معمول کی گشت کے دوران اطلاع موصول ہوئی کہ چار افراد علاقے میں منشیات بیچنے کی غرض سے گھوم رہے ہیں۔
ترجمان نے کہا کہ اس اطلاع پر فوری کارروائی کرتے ہوئے پولیس ٹیم نے جندرہ روڈ پر ناکہ لگا دیا اور ایک پنچ کار اور ایک بلیٹ موٹر سائیکل کو روکا۔
ان کا کہنا ہے کہ تلاشی کے دوران ملزموں کی تحویل سے تقریباً ۸گرام ہیروئن جیسا مواد بر آمد کیا گیا۔
پولیس ترجمان نے بتایا کہ بر آمد شدہ ہیروئن میں سے روہت جموال ولد شمشیرسنگھ ساکن جندرہ کی تحویل سے ۱۱ء۲گرام، ابھیشیک جموال ولد برج پال ساکن جندرہ کی تحویل سے۵۵ء۱گرام، اروند سنگھ عرف کاکا ولد ست پال ساکن جندرہ سے۲۳ء۲گرام اور آدتیہ سنگھ عرف ویرو ولد وکار سنگھ ساکن جندرہ کی تحویل سے۲۳ء۲گرام ہیروئن بر آمد کیا گیا۔
ان کا کہنا ہے کہ گاڑی اور موٹر سائیکل کو بھی ضبط کیا گیا۔انہوں نے کہا کہ اس سلسلے میں پولیس اسٹیشن جھاجر کوٹلی میں این ڈی پی ایس ایکٹ کے تحت ایک کیس درج کیا گیا اور مزید تحقیقات شروع کی گئی۔
