ڈیجیٹل فراڈ کیلئے سم کارڈ کے اجرا میں غفلت پر سخت قانونی کارروائی ہوگی ‘ جموںکشمیرپولیس کا انتباہ
سرینگر/۷ نومبر
اندرونی سلامتی کو مضبوط بنانے اور موبائل مواصلاتی خدمات کے غلط استعمال کو روکنے کیلئے جموں و کشمیر پولیس نے شوپیاں، پلوامہ، اننت ناگ، سوپور، اونتی پورہ اور ہندواڑہ اضلاع میں سم کارڈ فروشوں کی خصوصی جانچ کی۔
پولیس ترجمان نے ایک بیان میں کہا کہ یہ کارروائیاں ان دکانداروں کی نشاندہی اور ان کے خلاف کارروائی کیلئے کی گئیں جو ضروری تصدیقی عمل (ویریفکیشن) کے بغیر سم کارڈ جاری کر رہے تھے، جو عوامی تحفظ اور قومی سلامتی کے لیے سنگین خطرہ ہے۔
شوپیاں میں ایس ایس پی مشتاق احمد چودھری (جے کے پی ایس) کی نگرانی میں ضلع بھر میں بڑے پیمانے پر کریک ڈاؤن کیا گیا۔ پولیس ٹیموں نے متعدد ٹیلی کام مراکز پر اچانک چھاپے مارے۔
پلوامہ میں پولیس نے ضلع بھر کے سم فروشوں کی جامع جانچ مہم چلائی تاکہ تمام دکاندار قانون کے دائرے میں رہ کر کام کریں۔ پولیس ٹیموں نے مختلف علاقوں میں سم فروخت کے مراکز اور فرنچائز پوائنٹس کا معائنہ کیا۔
اننت ناگ میں پولیس نے آج ضلع بھر میں بڑے پیمانے پر کارروائی کی۔ متعدد ٹیموں نے بیک وقت مختلف مقامات پر سم فروشوں کی جانچ کی تاکہ محکمہ ٹیلی کمیونی کیشنز (ڈی او ٹی) کی ہدایات پر سختی سے عمل درآمد ہو۔ اس دوران گاہکوں کی دستاویزات، کے وائی سی عمل اور لائسنس کی جانچ کی گئی۔ فروشوں کو ان کے قانونی فرائض سے آگاہ کیا گیا اور خبردار کیا گیا کہ کسی بھی قسم کی غفلت یا خلاف ورزی پر سخت قانونی کارروائی ہوگی۔
سوپور میں پولیس نے ضلع بھر میں مربوط کریک ڈاؤن کیا۔ متعدد ٹیموں نے مختلف مقامات پر سم فروشوں کا معائنہ کیا تاکہ ٹیلی کمیونی کیشنز محکمے کے اصولوں پر عمل یقینی بنایا جا سکے۔
اونتی پورہ میں ایس ڈی پی اوز، ایس ایچ اوز اور متعلقہ پولیس پوسٹ انچارجز کی سربراہی میں پولیس نے بڑے پیمانے پر تصدیقی مہم اور چھاپے مار کارروائیاں کیں تاکہ سم کارڈز کے غیر قانونی اور سماج دشمن سرگرمیوں میں استعمال کو روکا جا سکے۔ پولیس ٹیموں نے مختلف سم فروخت مراکز پر تفصیلی جانچ اور چھاپے مارے تاکہ اجرائی کا عمل شفاف اور قانونی ہو۔
ہندواڑہ میں پولیس نے ہندواڑہ، قلم آباد، کرال گنڈ اور ویلگام کے علاقوں میں سم فروشوں کی خصوصی جانچ کی۔ یہ کارروائیاں سینئر پولیس افسران کی نگرانی میں کی گئیں جن کے دوران متعدد سم فروخت مراکز کا معائنہ کیا گیا تاکہ محکمہ ٹیلی کمیونی کیشنز (ڈی او ٹی) اور قانون نافذ کرنے والے اداروں کی ہدایات پر سختی سے عمل یقینی بنایا جا سکے۔
جموں و کشمیر پولیس نے قومی و عوامی سلامتی کے تحفظ، ڈیجیٹل نظام کے غلط استعمال کی روک تھام اور امن و استحکام کے خلاف سرگرمیوں پر مستقل نگرانی برقرار رکھنے کے اپنے عزم کا اعادہ کیا۔(ندائے مشرق خبر)
۔۔۔۔۔۔۔۔
