سرینگر/ ۵ نومبر
اونتی پورہ میں سڑک پار کرتے وقت ایک ۷۰ سالہ شخص کار کی ٹکر سے شدید زخمی ہو گیا، جو بعد میں سرینگر کے اسپتال میں زخموں کی تاب نہ لاتے ہوئے دم توڑ گیا۔
سرکاری ذرائع نے ایک مقامی خبر رساں ایجنسی کو بتایا کہ بزرگ راہگیر کو ابتدائی طور پر سب ڈسٹرکٹ اسپتال (ایس ڈی ایچ) اونتی پورہ منتقل کیا گیا، جہاں سے مزید علاج کے لیے اسے ایس ایم ایچ ایس اسپتال سرینگر بھیج دیا گیا، تاہم وہ جانبر نہ ہو سکا۔
متوفی کی شناخت غلام رسول چوپان ساکن پدگام پورہ اونتی پورہ کے طور پر ہوئی ہے۔
ذرائع کے مطابق، وہ سڑک پار کر رہے تھے جب ایک ماروتی گاڑی نے ٹکر مار دی، جس کے نتیجے میں ان کے سر پر شدید چوٹیں آئیں۔پولیس نے واقعے کے حوالے سے مقدمہ درج کر کے مزید تحقیقات شروع کر دی ہے۔
کشمیر میں حالیہ برسوں کے دوران سڑک حادثات میں نمایاں اضافہ دیکھنے کو مل رہا ہے، جس نے عوامی حلقوں میں گہری تشویش پیدا کر دی ہے۔ کبھی بے قابو تیز رفتاری، تو کبھی ناقص سڑکیں یا غیر محتاط ڈرائیونگ‘یہ تمام عوامل انسانی جانوں کے زیاں کا باعث بن رہے ہیں۔
شہری حلقوں کا کہنا ہے کہ تقریباً ہر روز کسی نہ کسی علاقے سے حادثے کی خبر آتی ہے، جس سے نہ صرف قیمتی جانیں ضائع ہو رہی ہیں بلکہ کئی خاندان اجڑ رہے ہیں۔
ماہرین کا ماننا ہے کہ ٹریفک قوانین پر عمل درآمد میں نرمی اور نگرانی کے فقدان نے اس مسئلے کو مزید سنگین بنا دیا ہے۔ عوامی سطح پر یہ مطالبہ زور پکڑ رہا ہے کہ انتظامیہ مؤثر حکمتِ عملی اختیار کرے، ٹریفک پولیس کی گشت میں اضافہ کیا جائے، اور بیداری مہمات چلائی جائیں تاکہ لوگوں میں احتیاط اور نظم و ضبط کا شعور پیدا ہو۔ بصورت دیگر، یہ رجحان مستقبل میں ایک بڑے سماجی بحران کی شکل اختیار کر سکتا ہے۔ایجنسیز
