سرینگر/۴ نومبر
سابق وزیر خارجہ ہرش وردھن شرنگلا نے کہا ہے کہ آپریشن سندور کے دوران ہونے والا فوجی تصادم چین اور پاکستان کے درمیان گہرے اسٹریٹیجک تعلقات کی عکاسی کرتا ہے۔
شرنگلا نے اس بات پر زور دیا کہ چین کی شمولیت دفاعی سازوسامان کی فراہمی تک محدود نہیں رہی بلکہ اس میں خفیہ معلومات اور سفارتی تعاون بھی شامل ہے، جس سے ایک ایسی ’’ہر موسم کی دوستی‘‘ وجود میں آئی ہے جس کا مقصد بھارت کے ابھار کو محدود کرنا ہے۔
پونے انٹرنیشنل سینٹر (پی آئی سی) کی جانب سے منعقد ایک نشست کے دوران شرنگلا نے بھارت کی خارجہ پالیسی اور تزویراتی امور پر گفتگو کی۔ اس نشست کی میزبانی سابق بھارتی سفیر برائے چین گوتم بمباوالے نے کی۔
شرنگلا نے کہا کہ بھارت کی خارجہ پالیسی حقیقت پسندی اور نظریاتی اصولوں کے درمیان توازن پر مبنی ہے، جو ترقیاتی ضروریات، تزویراتی خودمختاری اور جامع عالمی نقطہ نظر سے رہنمائی حاصل کرتی ہے۔
سابق سیکریٹری خارجہ نے بھارت کی جی۲۰ صدارت کے دوران حاصل تجربات کی روشنی میں عالمی منظرنامے، علاقائی حرکیات اور بدلتی ہوئی تزویراتی ترجیحات پر اپنے خیالات کا اظہار کیا۔
گفتگو میں چین اور پاکستان کے ساتھ تعلقات، جدید جنگ کے بدلتے تقاضے، ٹیکنالوجی، ڈرونز اور سائبر ٹولز کے دفاع اور سفارت کاری میں کردار جیسے موضوعات شامل تھے۔انہوں نے کہا کہ بھارت کو اپنی بین الاقوامی پوزیشن مستحکم کرنے کے لیے تزویراتی بازداریت، مؤثر سفارت کاری اور اندرونی ترقی پر یکساں توجہ دینی ہوگی۔
پاکستان کی جانب سے آپریشن سندور میں چینی اسلحے کے استعمال سے متعلق سوال کے جواب میں شرنگلا نے کہا کہ ’’یہ واقعہ چین اور پاکستان کی گہری تزویراتی شراکت داری کا مظہر ہے‘‘۔
سابق سیکریٹری خارجہ نے کہا کہ چین کی شمولیت دفاعی فراہمی سے آگے بڑھ کر انٹیلی جنس اور سفارتی حمایت تک پہنچی ہوئی ہے، اور اس اتحاد کا مقصد بھارت کے اثر و رسوخ کو محدود کرنا ہے۔ اس کے مقابلے کے لیے بھارت کو اپنی صلاحیتوں میں اضافہ، جدت، اور مفادات پر مبنی شراکت داریوں کو فروغ دینا چاہیے۔
پاکستان۔امریکہ تعلقات پر بات کرتے ہوئے شرنگلا نے کہا کہ آپریشن سندور کے بعد فیلڈ مارشل عاصم منیر نے واشنگٹن میں اپنی گرفت مضبوط کی ہے اور ٹرمپ ۰ء۲ حکومت کی توجہ دوبارہ حاصل کی ہے۔
امریکہ میں بھارت کے سفیر کی حیثیت سے اپنے تجربے کا حوالہ دیتے ہوئے انہوں نے کہا کہ پاکستان قلیل المدتی حربوں پر انحصار کرتا ہے جبکہ بھارت طویل المدتی اور ادارہ جاتی سفارت کاری پر یقین رکھتا ہے۔
شرنگلا نے کہا کہ بھارت کی اصل طاقت امریکہ، یورپ، انڈو پیسیفک اور گلوبل ساؤتھ کے ساتھ دیرپا تعلقات استوار کرنے میں ہے، جو مشترکہ جمہوری اقدار، تجارت، ٹیکنالوجی اور سلامتی کے تعاون پر مبنی ہیں۔
شرنگلا نے واضح کیا کہ بھارت دو طرفہ مسائل میں کسی تیسرے فریق کی ثالثی قبول نہیں کرتا، جیسا کہ شملہ معاہدے میں طے ہے۔ انہوں نے کہا کہ آرٹیکل۳۷۰ کی منسوخی سے جموں و کشمیر قومی دھارے میں شامل ہوچکا ہے اور اب علاقہ نسبتاً مستحکم ہے، سوائے سرحد پار دہشت گردی کے چند واقعات کے۔
سابق خارجہ سیکریٹری نے بھارت کی ’’پڑوسی ترجیح‘‘ پالیسی، مشرقِ وسطیٰ، جنوب مشرقی ایشیا اور گلوبل ساؤتھ کے ساتھ گہرے تعلقات کی اہمیت پر بھی زور دیا۔
شرنگلا نے بھارت کو ’’فکر اور ٹیکنالوجی کا رہنما‘‘ بنانے کے عزم کا اظہار کیا اور کہا کہ آنے والا عالمی مصنوعی ذہانت (اے آئی) اجلاس نئی ٹیکنالوجیوں کے نظم و نسق کے لیے ایک اہم قدم ثابت ہوگا۔
امریکہ۔چین مسابقت پر بات کرتے ہوئے انہوں نے کہا کہ اگرچہ دنیا دو قطبی نظام (جی ۲) کی طرف بڑھتی دکھائی دیتی ہے، بھارت کو اپنا تزویراتی دائرہ کسی صورت محدود نہیں کرنا چاہیے۔انہوں نے کہا کہ بھارت کی بڑھتی ہوئی معاشی اور تکنیکی قوت اسے کثیر قطبی دنیا میں ایک لازمی تیسرا ستون بناتی ہے۔
آخر میں انہوں نے زور دیا کہ بھارت کو سیمی کنڈکٹرز، قابل تجدید توانائی، مصنوعی ذہانت، دواسازی اور نایاب معدنیات جیسے شعبوں میں خود انحصاری بڑھانی چاہیے تاکہ عالمی سطح پر اپنا مقام مزید مستحکم کرسکے۔
(ندائے مشرق ڈیسک)
