اے پی کے ضلع سریکاکلم کی وینکٹیشورا مندر میں بھگدڑ‘۹افراد ہلاک

حیدرآباد یکم نومبر(یواین آئی)آندھرا پردیش کے ضلع سریکاکلم کاسی بُگا میں واقع وینکٹیشورا سوامی مندر میں ہفتہ کی صبح ایک المناک واقعہ پیش آیا، جب بھگدڑ کے واقعہ میں 9شردھالو ہلاک اورکئی دیگرزخمی ہوگئے ۔
اطلاعات کے مطابق، ایکادشی کے موقع پر ہزاروں شردھالوپوجا کے لئے مندر میں جمع ہو گئے تھے ۔ ہجوم میں اچانک بھگدڑ مچ گئی، جس سے کئی لوگ ایک دوسرے کے نیچے دب گئے ۔
زخمیوں کو فوری طور پر قریبی اسپتال منتقل کیا گیا جہاں بعض کی حالت تشویش ناک بتائی جا رہی ہے ۔ حکام کا کہنا ہے کہ اموات کی تعداد میں اضافہ ہونے کا اندیشہ ہے ۔
عینی شاہدین کے مطابق، زیادہ ہجوم کی وجہ سے ریلنگ ٹوٹ گئی جس کے بعد کئی لوگ گر پڑے اور بھگدڑ کی صورتحال پیدا ہو گئی۔ انتظامیہ نے واقعہ کی تحقیقات کے احکامات جاری کر دیئے ہیں۔
دریں اثناوزیرِ اعظم نریندر مودی نے ہفتہ کے روز آندھرا پردیش کے شری وینکٹیشور سوامی مندر میں پیش آئے بھگدڑ کے واقعے پر گہرے رنج و غم کا اظہار کیا ہے اور اعلان کیا ہے کہ ہلاک شدگان کے قریبی رشتہ داروں کو دو لاکھ روپے کی امدادی رقم اور ہر زخمی کو 50 ہزار روپے کی مالی مدد دی جائے گی۔
وزیر اعظم نے اپنے سرکاری اکاؤنٹ پر لکھا کہ ”آندھرا پردیش کے شری کاکولم میں وینکٹیشور سوامی مندر میں ہوئی بھگدڑ سے دکھ ہوا۔ میری ہمدردیاں اُن لوگوں کے ساتھ ہیں جنہوں نے اپنے پیاروں کو کھو دیا ہے ۔ میں پرارتھنا کرتا ہوں کہ زخمی جلد صحت یاب ہوں۔ جان گنوانے والوں کے اہلِ خانہ کو دو لاکھ روپے اور ہر زخمی کو پچاس ہزار روپے کی امدادی رقم دی جائے گی۔”
نائب صدر سی پی رادھا کرشنن نے بھی اس افسوسناک واقعے پر گہرے رنج و غم کا اظہار کیا ہے ۔ انہوں نے کہا کہ مندر میں پیش آیا یہ حادثہ انتہائی افسوسناک ہے اور اس سے انہیں گہرا دکھ پہنچا ہے ۔ نائب صدر نے سوگوار خاندانوں سے تعزیت کی اور زخمیوں کی جلد صحت یابی کی پرارتھنا کی۔
واضح رہے کہ یہ حادثہ مندر کے احاطے میں افراتفری مچنے کے بعد بھگدڑ کے سبب پیش آیا۔