’ایک گھر میں تین سے پانچ خاندان رہتے ہیں‘ دہائیوں کے بعد ایک نئی ہاؤسنگ کالونی مکمل ہوئی ہے‘
سرینگر/ یکم نومبر
وزیر اعلیٰ‘عمرعبداللہ نے ۲۰۱۴ کے بعد سرینگر کو نظر انداز کرنے کا الزام لگاتے ہوئے کہا کہ ان کی حکومت کشمیر کے اس مرکزی ضلع کو دو بارہ بنائیگی ۔
ہفتہ کوسرینگر میں ایک عوامی اجتماع سے خطاب کرتے ہوئے عمرعبداللہ نے سرینگر کی ترقیاتی جمود کی طرف توجہ دلاتے ہوئے سابقہ حکومتوں پر غفلت کا الزام لگایا۔
وزیر اعلیٰ نے کہا ’’۲۰۱۵ کے بعد ناانصافیاں اور غفلت ہوئی۔ اگر میں گننا شروع کروں تو دن ختم ہو جائے گا۔ آئیے دیکھیں کہ جنوری ۲۰۱۵ کے بعد سرینگر کو کون سا نیا منصوبہ ملا … خوبصورتی، ڈھانچے، ٹریفک مینجمنٹ یا سیلاب کنٹرول میں؟ کچھ نہیں۔ سب کچھ ۲۰۱۴ پر رک گیا۔‘‘انہوں نے اس بات پر زور دیا کہ یہ معاملہ صرف سرینگر تک محدود نہیں ہے، اور مزید کہا’’جموں شہر کو بھی اس کا حق نہیں ملا۔ گزشتہ دس برسوں میں دونوں شہروں کو جو نظرانداز کیا گیا، میری حکومت اس کو درست کرے گی۔ ہم مذہب، نسل یا علاقے کی بنیاد پر کوئی امتیاز نہیں کرتے‘‘۔
عمرعبداللہ نے اپنی بات کو مثالوں سے واضح کرتے ہوئے کہا’’جو پل ہم نے۲۰۱۱ میں شروع کیا، اسے مکمل ہونے میں پندرہ سال لگے کیونکہ ۲۰۱۴ کے بعد کام رک گیا۔ اس سے پہلے میری حکومت نے بولیوارڈ پر ٹریفک دباؤ کم کرنے کا منصوبہ شروع کیا تھا، مگر ہمارے جانے کے بعد وہ صرف کاغذوں میں رہ گیا‘‘۔
وزیر اعلیٰ نے اپنی حکومت کے حالیہ منصوبوں کا ذکر کرتے ہوئے کہا، ’’گلِ داؤد گارڈن صرف نو مہینوں میں مکمل ہوا۔ کیا یہ پچھلے نو سالوں میں نہیں ہو سکتا تھا؟ بیس برسوں میں صرف دو باغ بنے… ایک تولِپ گارڈن آزاد صاحب نے بنایا، اور اب گلِ داؤد گارڈن ہم نے‘‘۔
شہری رہائش کی کمی پر وزیراعلیٰ نے کہا، ’’ایک گھر میں تین سے پانچ خاندان رہتے ہیں۔ دہائیوں کے بعد ایک نئی ہاؤسنگ کالونی مکمل ہوئی ہے، اور کمزور طبقوں کے لیے بمنہ میں جلد کام شروع ہو گا‘‘۔
وزیر اعلیٰ نے کہا کہ ان کی حکومت محدود زمین کے مسئلے کے حل کے لیے عمودی توسیع کی منصوبہ بندی کر رہی ہے۔انہوں نے کہا ’’ہم دبئی یا مسقط کی طرح نئی زمین پیدا نہیں کر سکتے۔ ہمیں آٹھ یا دس منزلہ اپارٹمنٹس کی طرف جانا ہو گا تاکہ بھیڑ کم ہو‘‘۔
عمرعبداللہ نے سرینگر میں بہتر رابطے کی اہمیت پر زور دیا۔ان کاکہنا تھا’’ہمارا تجربہ ہے ‘ جتنے زیادہ پل دریائے جہلم پر بنائیں گے، ٹریفک کا دباؤ اتنا کم ہو گا۔کاونٹ اسکول کے قریب جو پل فٹ برج میں تبدیل کر دیا گیا تھا، اسے دوبارہ دو سطحی پل بنایا جائے گا … ایک سطح پیدل چلنے والوں کے لیے اور ایک گاڑیوں کے لیے۔‘‘
بلیوارڈ روڈ پر سیاحتی ٹریفک کو کم کرنے کے منصوبے کا خاکہ پیش کرتے ہوئے وزیر اعلیٰ نے اعلان کیا کہ ان کی حکومت سرنگ کی تعمیر پر غور کر رہی ہے۔انہوں نے کہا’’وہاں ہوٹل ہیں، دکانیں ہیں، ہاؤس بوٹس ہیں … ہم انہیں گرا نہیں سکتے۔ اس لیے ایک ٹریفک لائن باہر سے جائے گی اور دوسری پہاڑ کے نیچے سرنگ کے ذریعے۔‘
وزیر اعلیٰ نے کہا ’’ایسا کرنے سے ہم ٹریفک کا رش ختم کر سکتے ہیں۔ میں نے نائب وزیراعلیٰ سے کہا ہے کہ تخمینہ تیار کریں۔ دہلی سے فنڈ لینا پڑے تو وہ بھی لیں گے … مگر یہ منصوبہ بنائیں گے‘‘۔
سیلابی تیاری کے مسئلے پر بات کرتے ہوئے عمرعبداللہ نے۲۰۱۴ کے بعد منظور شدہ فنڈز کے استعمال پر سوال اٹھایا۔’’جہلم اور فلڈ چینل کی کھدائی کے لیے جو پیسہ ملا تھا، وہ کہاں گیا؟‘‘ انہوں نے پوچھا ’’کیا پی ڈی پی،بی جے پی حکومت کے دور میں ڈریجنگ ہوئی؟ اْس وقت وزیر کون تھا؟ آج وہ میرے نائب وزیراعلیٰ پر انگلی اٹھاتے ہیں ‘ مگر وولر پروجیکٹ کے پیسے کس نے کھائے؟ فائلیں کھولو اور سچ دکھاؤ۔‘‘
عمرعبداللہ نے کہا کہ حکومت کو لوگوں کو جواب دینا چاہیے کہ عالمی بینک اور سیلابی امداد کے فنڈز کا کیا ہوا۔انہوں نے کہا، ’’بتاؤ، وہ پیسہ کہاں گیا؟ کس نے اسے ہڑپ کیا؟‘‘ان کاکہنا تھا ’’اس سال صرف دو دن کی بارش نے سیلاب کا خطرہ پیدا کر دیا۔ ۲۰۱۴ میں سات دن کی بارش کے بعد سیلاب آیا تھا۔ ہمیں صرف اس لیے بچایا گیا کہ اللہ نے بارش روک دی۔ ان سالوں میں سرینگر شہر کے لیے کیا کیا گیا، جو اب بھی نظرانداز ہو رہا ہے؟‘‘
وزیراعلیٰ نے کہا کہ ان کی حکومت نے ہمیشہ بغیر تعصب اور امتیاز کے کام کیا۔انہوں نے کہا ’’ہم وہ ہیں جو مذہب یا علاقے کو نہیں دیکھتے۔ ہم انصاف اور برابری کے لیے کام کرتے ہیں‘‘۔
عمرعبداللہ نے اپنی حکومت کے فلاحی اقدامات کا ذکر کرتے ہوئے کہا ’’ہم جانتے تھے کہ ہماری بہنوں کو ٹرانسپورٹ میں دشواریاں ہیں، اس لیے ہم نے سرکاری بسوں میں خواتین کے لیے مفت سفر کا انتظام کیا۔ ہم لوگوں کو پانچ سال انتظار نہیں کرواتے … ہم روز وعدے پورے کرتے ہیں۔‘‘
اپنی تقریر کا اختتام عزم و یقین کے پیغام کے ساتھ کرتے ہوئے عمر نے کہا’’ہماری نیتیں صاف ہیں، اور ہماری نگاہیں خدا پر ہیں۔ جن کی نیتیں پاک ہوں وہ رکاوٹوں سے نہیں ڈرتے۔ ہم تھکنے والے نہیں ، ہم سرینگر کو دوبارہ بنائیں گے، جموں کی شان بحال کریں گے، اور اس اتحاد کو مضبوط کریں گے جس کی علامت در بار موو ہے۔(ندائے مشرق خبر)‘‘
