رائے بریلی: مبینہ تانترک گرفتار

رائے بریلی:24 اکتوبر (یو این آئی) اتر پردیش کے ضلع رائے بریلی کے گدگنج علاقے میں ایک خاتون کے علاج کے نام پر مذہبی عقائد کا غلط استعمال اور غیر شائستہ برتاؤ کے الزام میں پولیس نے ایک خود ساختہ تانترک کو گرفتار کیا ہے ۔
ایڈیشنل سپرنٹنڈنٹ آف پولیس سنجیو کمار سنہا نے جمعہ کو بتایا کہ گدگنج علاقے کے مادھوپور گاؤں میں وائرل ویڈیو کو مدنظر رکھتے ہوئے پولیس نے ایک شخص، سریش کمار پاسوان، کو ایک خاتون کے ساتھ غیر اخلاقی سلوک کرنے کے الزام میں گرفتار کیا ہے ۔
انہوں نے بتایا کہ یہ ویڈیو تقریباً دو سال پرانا ہے ، لیکن چونکہ حال ہی میں یہ سوشل میڈیا پر تیزی سے وائرل ہوا، اس لیے پولیس نے معاملے کو اب سنجیدگی سے لیتے ہوئے کارروائی کی ہے ۔ بتایا گیا ہے کہ جہاں اس ویڈیو میں درخت نظر آتا ہے ، وہاں اب ایک مندر تعمیر ہو چکا ہے ۔ ملزم بنیادی طور پر کسان ہے ، لیکن وہ تانترک عمل اور جھاڑ پھونک کے کام میں بھی ملوث پایا گیا ہے ۔
ویڈیو میں ملزم کو خاتون کے ساتھ غیر شائستہ رویہ اختیار کرتے اور اس کی عزت مجروح کرتے ہوئے دیکھا جا سکتا ہے ۔ اس ویڈیو نے یہ بھی اجاگر کیا ہے کہ دیہی علاقوں میں توہم پرستی کے نام پر اس طرح کے خود ساختہ تانترک کس طرح سادہ لوح لوگوں کا استحصال کر رہے ہیں۔
پولیس نے ملزم کے خلاف متعلقہ دفعات کے تحت مقدمہ درج کر کے اسے جیل بھیج دیا ہے ۔ ایڈیشنل ایس پی نے خبردار کیا کہ اگر کوئی شخص اس طرح کا غیر اخلاقی یا دھوکہ دہی والا عمل کرتا پایا گیا تو اس کے خلاف قانون کے مطابق سخت کارروائی کی جائے گی۔