اے پی حادثہ۔ بچ جانے والے مسافروں نے خوفناک مناظر اورلرزہ خیز تجربات بیان کئے 

حیدرآباد 24اکتوبر(یواین آئی)آندھرا پردیش میں جمعہ کی صبح پیش آنے والے افسوسناک واقعہ کے بچ جانے والے مسافروں نے خوفناک مناظر بیان کئے جب وہ نیند سے جاگے تو پوری بس آگ کی لپیٹ میں تھی۔ یہ حادثہ اُس وقت پیش آیا جب بس ایک موٹر سائیکل سے ٹکرا گئی جس کے بعد اچانک آگ بھڑک اٹھی۔
مسافروں نے بتایا کہ وہ بس کے اندر پھنس گئے تھے کیونکہ دروازے بند تھے جس کے باعث انہیں ایمرجنسی کھڑکیاں توڑ کر باہر نکلنا پڑا۔
بچ جانے والوں میں جینت کشواہا اوراشوک کشواہا نے اپنے لرزہ خیز تجربات سناتے ہوئے بتایا کہ کس طرح وہ بمشکل اپنی جان بچانے میں کامیاب ہوئے ۔ ان کے مطابق تقریباً 20 مسافر زندہ باہر نکل آئے جبکہ کم از کم 20 افراد زندہ جھلس کر ہلاک ہوگئے ۔
جنیت کشواہا جو حیدرآباد سے سفر کررہے تھے نے بتایا کہ جب وہ 2.30بجے جاگے تو دیکھا کہ بس آگ میں جل رہی ہے ۔
انہوں نے بتایا کہ میں جاگا تو دیکھا کہ آگ لگ چکی ہے ۔ صرف دو تین لوگ جاگ رہے تھے ۔ ہم نے چیخ کر سب کو جگایا۔ دروازے بند تھے ، ڈرائیور کہیں نظر نہیں آیا۔ ہم نے ایمرجنسی کھڑکی توڑی کیونکہ مین دروازہ بند تھا، اور باہر کود گئے ۔ کئی لوگ کھڑکیاں توڑ کر باہر نکلے ۔
حکام کے مطابق جائے حادثہ پر امدادی کارروائیاں جاری ہیں جبکہ زخمیوں کو قریبی اسپتالوں میں منتقل کر دیا گیا ہے ۔ حادثہ کی تحقیقات کا آغاز کر دیا گیا ہے ۔