وزیر اعلیٰ عمر کا راجیہ سبھا انتخابات میں ممکنہ ہیر پھیر کا الزام

سرینگر/۲۴؍ اکتوبر
وزیر اعلیٰ عمر عبداللہ نے جمعہ کو جموں و کشمیر میں ہوئے راجیہ سبھا انتخابات میں ممکنہ ہیر پھیر کا الزام لگاتے ہوئے کہا کہ بی جے پی کو ’چار اضافی ووٹ‘ ملے، حالانکہ نیشنل کانفرنس کے ووٹ شمار میں کوئی کمی نہیں آئی۔
عمر نے ایک پوسٹ میں کہا’’ہمارے تمام ووٹ چار انتخابات میں جتنے بھی تھے وہ صحیح رہے، جیسا کہ ہمارے انتخابی ایجنٹ نے ہر پولنگ سلپ دیکھ کر تصدیق کی۔ ہمارے کسی رکن اسمبلی نے کراس ووٹنگ نہیں کی، تو پھر یہ سوال پیدا ہوتا ہے کہ بی جے پی کے چار اضافی ووٹ کہاں سے آئے؟’’
وزیر اعلیٰ نے مزید پوچھا’’کون سے رکن اسمبلی نے جان بوجھ کر اپنے ووٹ غلط نمبر دے کر کالعدم کر دیے؟ کیا وہ یہ اعتراف کرنے کی ہمت رکھتے ہیں کہ انہوں نے بی جے پی کی مدد کی؟ کس دباؤ یا لالچ نے انہیں یہ قدم اٹھانے پر مجبور کیا؟‘‘
عمرعبداللہ نے کہا کہ اب وقت آ گیا ہے کہ ’جو لوگ خفیہ طور پر بی جے پی کی مدد کر رہے تھے‘ سامنے آئیں اور ذمہ داری قبول کریں۔
وزیر اعلیٰ کے بیانات اس وقت سامنے آئے جب انتخابات کے نتائج میں نیشنل کانفرنس نے تین نشستیں جیتیں اور بی جے پی نے ایک نشست حاصل کی۔