بھنڈ، 23 اکتوبر (یو این آئی) مدھیہ پردیش کے بھنڈ ضلع سے دتیا کے رتن گڑھ ماتا مندر درشن کے لیے روانہ ہوئے عقیدت مندوں کا سفر ایک المناک حادثے میں بدل گیا۔ پیر کی رات دیر گئے بھنڈ کے مو-سینوڑھا روڈ پر ایک مردہ کالی گائے سے تین مختلف موٹر سائیکلیں ٹکرا گئیں۔ اس حادثے میں ایک نوجوان موقع پر ہی ہلاک ہو گیا، جبکہ پانچ افراد شدید زخمی ہو گئے ۔ تمام زخمیوں کو بھنڈ ضلعی اسپتال میں داخل کرایا گیا ہے ۔
پولیس ذرائع کے مطابق، بھنڈ کے اکوڑا گاؤں کے رہائشی 25 سالہ اجیت یادو اور 23 سالہ آنند یادو رتن گڑھ ماتا مندر جانے کے لیے نکلے تھے ۔ رات تقریباً 10 بجے مو-سینوڑھا ہائی وے پر ان کی بائیک مردہ گائے سے ٹکرا گئی۔ اس حادثے میں اجیت کی موقع پر ہی موت ہو گئی، جبکہ آنند شدید زخمی ہو گیا۔
اسی راستے سے گزر رہے اکوڑا گاؤں کے ہی 22 سالہ شیشو پال یادو اور 23 سالہ جتیندر یادو کی بائیک بھی اسی مردہ گائے سے ٹکرا گئی، جس سے وہ دونوں زخمی ہو گئے اور اسپتال منتقل کیے گئے ۔
رات تقریباً تین بجے رتن گڑھ سے واپس لوٹ رہے 40 سالہ پریم سنگھ یادو اور 26 سالہ سنجے یادو، بھی اسی جگہ مردہ گائے سے ٹکرا گئے ۔ اس حادثے میں دونوں شدید زخمی ہوئے ۔
ایک ہی مقام پر لگاتار تین حادثات ہونے سے علاقے میں افراتفری پھیل گئی۔ مقامی لوگوں نے پولیس کو اطلاع دی۔ زخمیوں کو علاج کے لیے ضلعی اسپتال میں داخل کرا دیا گیا۔
مدھو مکھیوں سے بچنے کے لیے تالاب میں کودنے والے باپ بیٹے کی ڈوبنے سے موت
جگدلپور، 23 اکتوبر (یو این آئی) چھتیس گڑھ کے ضلع بستر کے کپاونڈ تھانہ علاقے کے گاؤں چوکنار میں بدھ کو جنگل میں مدھو مکھیوں کے حملے سے بچنے کی کوشش میں تالاب میں کودنے والے باپ اور بیٹے کی ڈوب کر موت ہو گئی۔
پولیس سے ملی معلومات کے مطابق، متوفی بھونیشور پٹیل (60) اور ان کا بیٹا وینو پٹیل (35) کل دوپہر گاؤں کے قریب جنگل میں گھاس کاٹنے گئے تھے ۔ اسی دوران جنگل کے ایک حصے میں مدھو مکھیوں نے باپ بیٹے پر حملہ کردیا۔ دونوں نے جان بچانے کے لیے تالاب کی طرف بھاگ کر اس میں چھلانگ لگا دی۔
کچھ دیر بعد جب دونوں باہر نہیں نکلے تو گاؤں والوں نے شور مچایا اور پولیس کو اطلاع دی۔ پولیس نے موقع پر پہنچ کر غوطہ خوروں کی مدد سے شام تک تلاش جاری رکھی، لیکن اندھیرا ہونے کی وجہ سے کارروائی روک دی گئی۔
آج صبح دوبارہ تلاش مہم شروع کی گئی، جس کے دوران دونوں کی لاشیں تالاب سے برآمد ہوئیں۔
