جنگلاتی رقبے میں ہندوستان عالمی سطح پر نویں مقام پر پہنچا

نئی دہلی، 22 اکتوبر (یو این آئی) ہندوستان نے عالمی ماحولیاتی تحفظ کے میدان میں ایک اہم کامیابی حاصل کی ہے اور یہ مجموعی جنگلاتی رقبے کے لحاظ سے دنیا میں نویں مقام پر پہنچ گیا ہے ۔
انڈونیشیا کے بالی میں اقوامِ متحدہ کے خوراک و زراعت کے ادارے (ایف اے او) کی جانب سے جاری کردہ عالمی جنگلاتی وسائل کے جائزے (جی ایف آر اے ) 2025 کے مطابق، ہندوستان نے جنگلاتی رقبے کے معاملے میں یہ نمایاں مقام حاصل کیا ہے ۔
ماحولیات، جنگلات اور آب و ہوا کی تبدیلی کے مرکزی وزیر بھوپندر یادو نے اس پیش رفت کے بارے میںسوشل میڈیا پلیٹ فارم ‘ایکس’ پر ایک پوسٹ میں یہ اطلاع دی۔
گزشتہ جائزہ میں ہندوستان 10 ویں نمبر پر تھا ۔ وزیر موصوف نے بتایا کہ ملک نے جنگلات کے سالانہ رقبے میں اضافے کے معاملے میں دنیا بھر میں اپنی تیسری پوزیشن برقرار رکھی ہے ، جس سے اس کے پائیدار جنگلات کے انتظام اور ماحولیاتی توازن کے لیے اپنے عزم کا اعادہ ہوتا ہے ۔
وزیراعظم نریندر مودی کے ایک پیڑ ماں کے نام کی اپیل اور ماحولیاتی بیداری پر ان کے مسلسل زور نے پورے ملک میں لوگوں کوشجرکاری اور جنگلاتی تحفظ میں فعال طور پر حصہ لینے کی ترغیب دی ہے ۔
یہ بڑھتی ہوئی عوامی شراکت داری سبز اور پائیدار مستقبل کے لیے اجتماعی ذمہ داری کے مضبوط احساس کو فروغ دے رہی ہے ۔ وزیر موصوف نے کہا کہ یہ کامیابی مودی حکومت کی منصوبہ بندی اور جنگلات کے تحفظ اور اضافے کی پالیسیوں اور ریاستی حکومتوں کی طرف سے بڑے پیمانے پر شجرکاری کی کوششوں کی وجہ سے حاصل ہوئی ہے ۔