بی جے پی ریاستی صدر کی چاچی کے خاندان کا سی ایم ہیلپ لائن میں مدد نہ ملنے کا الزام

بیتول، 17 اکتوبر (یو این آئی) مدھیہ پردیش میں سی ایم ہیلپ لائن کے طرز عمل پر اس وقت بڑا سوال کھڑا ہوگیا ، جب بی جے پی کے ریاستی صدر ہیمنت کھنڈیلوال کے اہل خانہ نے سی ایم ہیلپ لائن میں شکایت کرنے کے باوجود تصفیہ نہ ہونے کا الزام لگایا۔
ذرائع کے مطابق، شکایت مسٹر کھنڈیلوال کے خاندان کے رکن ششی کھنڈیلوال (آنجہانی ٹلّو کھنڈیلوال کی اہلیہ) نے درج کروائی تھی۔ الزام ہے کہ سڑک سے تجاوزات نہ ہٹانے کے 40 دنوں کے بعد تحصیلدار نے شکایت کنندہ کا او ٹی پی لیا اور شکایت کو ”حل” قرار دیتے ہوئے اسے بند کردیا۔
محترمہ ششی کھنڈیلوال نے بتایا کہ نرمدا نگر کی رہنے والی نینو نولے نے ان کے گھر کے سامنے سڑک پر تجاوزات کررکھی تھیں۔ انہوں نے 6 ستمبر 2025 کو سی ایم ہیلپ لائن پر شکایت نمبر 34314500 درج کرائی۔ شکایت کی جانچ پٹواری، آر آئی، میونسپل انسپکٹر اور بیتول کے تحصیلدار کو سونپی گئی۔
ششی کھنڈیلوال کے بیٹے پونیت کھنڈیلوال نے بتایا کہ محلے کے مکینوں نے بھی 15 فٹ چوڑی سڑک پر تجاوزات پر اعتراض کیا تھا۔ بلدیہ اور چیف منسٹر ہیلپ لائن پر شکایات درج کرانے کے باوجود 40 دن تک کوئی کارروائی نہیں کی گئی۔ اس کے بعد، تحصیلدار نے سائٹ کا دورہ کیا، ایک او ٹی پی لیا اور شکایت کو ‘حل’ قرار دیا، جب تک کہ تجاوزات برقرار رہے ۔
پونیت کھنڈیلوال نے الزام لگایا کہ تحصیلدار نے تجاوزات ہٹائے بغیر شکایت بند کرنے کے لیے ان کی ماں کو گمراہ کیا۔ یہ یک طرفہ تحقیقات تھی اور تحصیلدار نے انتظامیہ کو غلط رپورٹ پیش کی۔
تحصیلدار گووند مالویہ نے بتایا کہ شکایت کنندہ نے خود او ٹی پی فراہم کیا تھا۔ معاملہ زیر غور ہے ، جلد ہی تجاوزات ہٹانے کے لیے کارروائی کی جائے گی۔
کلکٹر نریندر سوریہ ونشی نے کہا کہ یہ معاملہ ان کے نوٹس میں آیا ہے ۔ معاملے کی تحقیقات کر کے ذمہ داروں کے خلاف کارروائی کی جائے گی۔یو این آئی۔ این یو۔