کپوارہ آتشزدگی میں دو منزلہ مکان خاکستر

سرینگر/۱۶؍اکتوبر
شمالی کشمیر کے ضلع کپوارہ کے ٹنگڈار علاقے میں دوران شب آتشزدگی کے ایک واقعے میں دو منزلہ رہائشی مکان خاکستر ہوا۔
ذرائع نے بتایا کہ کپوارہ کے بدر کوٹ تکیہ ٹنگڈار علاقے میں بدھ اور جمعرات کی درمیانی شب ایک دو منزلہ مکان سے آگ نمودار ہوئی۔
محکمہ فائر اینڈ ایمرجنسی کے ایک عہدیدار نے بتایا کہ آگ لگنے کے بارے میں اطلاع موصول ہونے کے ساتھ فائر ٹنڈرس کو جائے موقع پر بھیج دیا گیا جنہوں نے مقامی رضاکاروں کی مدد سے آگ کو قابو میں کر لیا۔ انہوں نے کہا کہ آگ کے اس واقعے میں ایک دو منزلہ مکان کو شدید نقصان پہنچا۔
ان کا کہنا ہے کہ آگ لگنے کی وجوہات معلوم کی جا رہی ہے تاہم کسی جانی نقصان کی کوئی اطلاع نہیں ہے۔
قابل ذکر ہے کہ جموں و کشمیر فائر اینڈ ایمرجنسی سروسز نے سردیوں کے موسم میں آگ لگنے کے بڑھتے ہوئے واقعات کے پیش نظر عوام کے لیے ایک اہم ایڈوائزری جاری کی ہے، جس میں شہریوں سے احتیاطی تدابیر اپنانے اور چوکسی برقرار رکھنے کی اپیل کی گئی ہے۔
ایڈوائزری میں کہا گیا ہے کہ سردیوں میں ہیٹنگ آلات اور گیس اسٹوو وغیرہ کے زیادہ استعمال کے سبب اکثر آگ لگنے کے واقعات پیش آتے ہیں، لہٰذا عوام کو چاہئے کہ وہ درج ذیل ہدایات پر سختی سے عمل کریں۔
محکمہ نے ہدایت دی ہے کہ تمام برقی ہیٹنگ آلات، بخاری، اور ایل پی جی گیس اسٹوو کو سونے سے قبل یا گھر سے نکلنے سے پہلے بند کر دیا جائے۔ اسی طرح کانگڑی کا استعمال احتیاط سے کیا جائے اور رات کے وقت اسے محفوظ جگہ پر رکھا جائے تاکہ کسی حادثے کا خدشہ نہ رہے۔