وزیراعظم مودی کا جمعرات کو دورہ اے پی۔کئی ترقیاتی پراجکٹس کا سنگ بنیاد رکھیں گے اوربیشتر پراجکٹس قوم کے نام کریں گے

حیدرآباد 15اکتوبر(یواین آئی)وزیر اعظم نریندر مودی جمعرات کو آندھرا پردیش کا دورہ کریں گے ، جہاں وہ کئی ترقیاتی پراجکٹس کا سنگ
بنیاد رکھیں گے اور بیشتر پراجکٹس کو قوم کے نام وقف کریں گے ۔
مودی اپنے دورہ کا آغاز سری سیلم کے بھرمارمبھاملکارجن سوامی ورلا دیواستھانم اور سری شیواجی اسپورتی کیندر سے کریں گے ۔ اس کے بعد وہ کرنول جائیں گے جہاں وہ 13,430 کروڑ روپے مالیت کے مختلف پراجکٹس کا افتتاح و سنگِ بنیاد رکھیں گے اور جلسہ سے خطاب بھی کریں گے ۔
سری سیلم میں وزیر اعظم ملکارجن سوامی مندر میں پوجا ادا کریں گے ،وزیر اعظم سری شیواجی اسپورتی کیندرا کا بھی دورہ کریں گے جو ایک یادگاری کامپلکس ہے ۔ اس میں ایک گیان دھیان ہال شامل ہے جس کے چاروں کونوں پر پرتھاپ گڑھ، راج گڑھ، رائے گڑھ اور شیونری قلعوں کے ماڈل نصب ہیں۔ اس کے مرکز میں چھترپتی شیواجی مہاراج کا مجسمہ ہے جو مراقبہ کی حالت میں دکھایا گیا ہے ۔ یہ مرکز سری شیواجی میموریل کمیٹی چلاتی ہے جو 1677 میں چھترپتی شیواجی کی اس مندر پر تاریخی آمد کی یاد میں قائم کی گئی تھی۔
کرنول میں وزیر اعظم مودی صنعت، پاور ٹرانسمیشن، سڑکوں، ریلوے ، دفاعی پیداوار اور پٹرولیم و قدرتی گیس کے شعبوں میں تقریباً 13,430 کروڑ روپے کے مختلف ترقیاتی پراجکٹس کا سنگ بنیاد رکھیں گے ، افتتاح کریں گے اور قوم کے نام کریں گے ۔ یہ پراجکٹس مرکزی حکومت کے اس عزم کی عکاسی کرتے ہیں کہ آندھرا پردیش میں بنیادی ڈھانچہ کو مضبوط کیا جائے ، صنعتی ترقی کو فروغ دیا جائے اور سماجی و معاشی ترقی کو تیز کیا جائے ۔
وزیر اعظم 2,880 کروڑ روپے کی لاگت سے کرنول III پولنگ اسٹیشن پر ٹرانسمیشن سسٹم پراجکٹ کا سنگِ بنیاد رکھیں گے ۔ اس میں 765 کلو وولٹ ڈبل سرکٹ کرنول III پولنگ اسٹیشن تا چلکالوری پیٹ ٹرانسمیشن لائن کی تعمیر شامل ہے ، اس سے 6,000 ایم وی اے کی اضافی ٹرانسفارمیشن صلاحیت پیدا ہوگی اور ملک میں قابلِ تجدید توانائی کی بڑی مقدار منتقل کی جا سکے گی۔
مودی کرنول میں اورواکل انڈسٹریل ایریا اور کڑپہ کے کوپرتی انڈسٹریل ایریا کے سنگِ بنیاد بھی رکھیں گے ، جن پر جملہ 4,920 کروڑ روپے خرچ ہوں گے ۔ یہ جدید صنعتی مراکز نیشنل انڈسٹریل کوریڈور ڈیولپمنٹ اینڈ امپلیمینٹیشن ٹرسٹ اور آندھرا پردیش انڈسٹریل انفراسٹرکچر کارپوریشن لمیٹڈ کے اشتراک سے تیار کیے جا رہے ہیں۔ یہ ‘پلگ اینڈ پلے ‘ انفراسٹرکچر اور ‘واک ٹو ورک’ کے جدید نظریہ پر مبنی ہیں۔ ان سے 21,000 کروڑ روپے کی سرمایہ کاری متوقع ہے اور تقریباً ایک لاکھ روزگار کے مواقع پیدا ہوں گے ، جس سے رائلسیما علاقہ کی صنعتی ترقی میں تیزی آئے گی۔
وزیر اعظم سباورم سے شیلا نگر تک چھ لین گرین فیلڈ ہائی وے کا سنگِ بنیاد بھی رکھیں گے جس پر 960 کروڑ روپے کی لاگت آئے گی۔ اس پراجکٹ سے وشاکھاپٹنم میں ٹریفک دباؤ کم ہوگا اور تجارت و روزگار میں سہولت پیدا ہوگی۔
اس کے علاوہ تقریباً 1,140 کروڑ روپے کی لاگت سے 6سڑک کے پراجکٹس بھی افتتاح کے لئے تیار ہیں، جو سفر کے وقت میں کمی، حفاظت میں بہتری اور ریاست بھر میں رابطہ کو مضبوط کریں گے ۔
ریلوے کے شعبہ میں وزیر اعظم 1,200 کروڑ روپے سے زائد کے پراجکٹس کا سنگِ بنیاد رکھیں گے اور انہیں قوم کے نام کریں گے ۔ ان میں کوتاولسا۔وزیانگرم چوتھی ریلوے لائن، پندورتی تا سمہاچلم نارتھ کے درمیان ریلوے فلائی اوور کا سنگِ بنیا د بھی شامل ہے ۔
توانائی کے شعبہ میں مودی سریکاکلم۔انگل نیچرل گیس پائپ لائن کو قوم کے نام کریں گے ، جو گیل انڈیا لمیٹڈ نے 1,730 کروڑ روپے کی لاگت سے تعمیر کی ہے ۔ یہ پائپ لائن آندھرا پردیش میں 124 کلومیٹر اور اوڈیشہ میں 298 کلومیٹر طویل ہے ۔
وزیر اعظم چتور میں انڈین آئیل کے 60 ہزار میٹرک ٹن فی سال کی گنجائش والے ایل پی جی بوتلنگ پلانٹ کا بھی افتتاح کریں گے جو 200 کروڑ روپے کی لاگت سے قائم کیا گیا ہے ۔ یہ پلانٹ آندھرا پردیش کے چار، تمل ناڈو کے دو اور کرناٹک کے ایک ضلع کے تقریباً 7.2 لاکھ صارفین کو گیس فراہم کرے گا۔
دفاعی پیداوار کے شعبہ کو مضبوط بنانے مودی نمالورو(ضلع کرشنا) میں بھارت الیکٹرانکس لمیٹڈ کے قائم کردہ 360 کروڑ روپے مالیت کے اڈوانسڈ نائٹ ویژن پراڈکٹس فیکٹری کا افتتاح بھی کریں گے ۔ یہ فیکٹری ہندوستانی مسلح افواج کے لئے جدید الکٹرو آپٹیکل نظام تیار کرے گی جس سے دفاعی خود انحصاری کو فروغ ملے گا اور مقامی سطح پر ہنر مند روزگار پیدا ہوگا۔