قمرواری میں نوجوان پر کلہاڑی سے حملہ‘ تینوں ملزمان کو گرفتار :پولیس

سرینگر/۱۵؍اکتوبر
سرینگر پولیس نے قمرواری علاقے میں ایک نوجوان پر کلہاڑی سے حملہ کرنے کی پادائش میں تین ملزمان کو گرفتار کر لیا ہے۔
پولیس کے مطابق نوجوان نعمان یعقوب پر ۱۴ ؍اکتوبر کو ہلال آباد، قمرواری میں ہارون بیکری کے قریب نامعلوم افراد نے کلہاڑی سے حملہ کیا۔ واقعے کے فوراً بعد متاثرہ کے والد محمد یعقوب نے پولیس پوسٹ قمرواڑی میں رپورٹ درج کرائی۔
پولیس نے بتایا کہ شکایت موصول ہوتے ہی پولیس اسٹیشن پارمپورہ میں مختلف دفعات کے تحت کیس درج کرکے تحقیقات شروع کی گئی۔
تحقیقات کے دوران تین ملزمان جن کی شناخت ساحل یعقوب گروستو، فاروق عرف فرحان احمد اور بلال احمد ساکنان بوٹ مین کالونی بمنہ کے بطور ہوئی کی گرفتاری عمل میں لائی گئی۔ پولیس نے بتایا کہ تمام ملزمان کو راتوں رات چھاپوں کے دوران گرفتار کیا گیا اور استعمال ہونے والا ہتھیار بھی برآمد کر لیا گیا ہے۔
ابتدائی تحقیقات سے پتہ چلا ہے کہ یہ حملہ ذاتی دشمنی کا نتیجہ تھا، تاہم مزید جانچ جاری ہے تاکہ دیگر ممکنہ پہلوؤں کا تعین کیا جا سکے۔
پولیس نے عوام کو یقین دلایا کہ سماجی جرائم کے خلاف سخت اور بروقت کارروائی جاری رہے گی تاکہ شہر میں امن و امان قائم رہے۔
پولیس نے کہا’’ایسے واقعات میں ملوث افراد کے ساتھ کسی قسم کی رعایت نہیں کی جائے گی اور شہر کو محفوظ رکھنے کیلئے تمام اقدامات کیے جائیں گے۔‘‘