دہلی میں زیورات کی دکان پر ڈکیتی اور بہار میں بینک ڈکیتی کا ماسٹر مائنڈ گرفتار

نئی دہلی، 13 اکتوبر (یو این آئی) دہلی پولس کی کرائم برانچ کی ویسٹرن زون-2 ٹیم نے ہریانہ کے سوہنا سے بدنام جرائم پیشہ کو گرفتار کیا ہے ، جو دہلی میں زیورات کی دکان پر ڈکیتی اور بہار میں بینک ڈکیتی کے دو سنسنی خیز مقدموں کے سلسلے میں مطلوب تھا۔ ملزم کی شناخت سیتامڑھی، بہار کے باشندے دیپ شبھم کے طور پر ہوئی ہے ۔ وہ اس وقت ہری نگر، سوہنا، گڑگاؤں میں مقیم تھا۔
ڈپٹی پولس کمشنر ہرش اندورا نے پیر کے روز بتایا کہ ملزم کو ماڈل ٹاؤن تھانے میں ڈکیتی کے دو مقدمات میں عدالت نے اشتہاری مجرم قرار دیا ہے ۔ مخصوص معلومات کی بنیاد پر کرائم برانچ کی ٹیم نے تکنیکی نگرانی کے بعد ملزم کو اس کے سوہنا میں واقع ٹھکانے سے گرفتار کیا۔
تحقیقات سے پتہ چلا کہ دیپ شبھم اعلیٰ تعلیم یافتہ جرائم پیشہ شخص ہے ۔ اس نے بی ایس سی اور ایم ایس سی کی ڈگری حاصل کی ہے ۔ دہلی یونیورسٹی سے 2017 میں کیمسٹری سے ایم فل کی ہے ۔ اس نے اپنے کیمیائی علم کا استعمال اسموک بم بنانے کے لیے کیا ہے تاکہ بہار کے سیتامڑھی میں بینک آف انڈیا میں خوف و ہراس پھیلایا جا سکے ۔ اس نے اکیلے ہی بینک سے تقریباً 3.60 لاکھ روپے کی نقدی لوٹ لی۔
بعد میں اس نے مجرم رتیش ٹھاکر سے جیل میں ملاقات کی، اور رہا ہونے کے بعد، ان دونوں نے دہلی کے ماڈل ٹاؤن علاقے میں زیورات کی دو دکانوں میں ڈکیتی کی واردات انجام دی۔ پولیس فی الحال ملزم سے پوچھ گچھ کر رہی ہے اور اس کے نیٹ ورک اور ممکنہ ساتھیوں سے تفتیش کر رہی ہے ۔