سرینگر/۱۱؍اکتوبر
جموں کشمیر اینٹی کورپشن بیورو (اے سی بی) سرینگر نے ایک پولیس افسر کے خلاف غیر متناسب اثاثہ جات حاصل کرنے کے الزام پر مقدمہ درج کرتے ہوئے ضلع بڈگام میں واقع اس کے دو رہائشی مکانوں پر چھاپے مارے ہیں۔
بیورو کے ایک ترجمان نے بتایا کہ اینٹی پورپشن بیورو پولیس اسٹیشن سری نگر نے ایک پولیس افسرجو ضلع پولیس دفتر بانڈی پورہ میں کیشئر کے بطور تعینات تھا، کے خلاف ناجائز ذرائع سے حاصل کر دہ غیر متناسب اثاثوں کے الزام میں ایف آئی آر زیر نمبر۲۰۲۵/۲۰کے تحت ایک مقدمہ درج کیا ہے ۔
ملزم کی شناخت پیرزادہ مشکور احمد شاہ انسپکٹر (ایم) ولد پیر زادہ محمد اکبر شاہ ساکن جوالہ پورہ بڈگام کے طور پر کی گئی ہے ۔
ترجمان نے کہا کہ یہ مقدمہ پولیس اسٹیشن اے سی بی سری نگر میں ایک خفیہ تصدیقی کارروائی کے بعد درج کیا گیا جس میں یہ انکشاف ہوا کہ مذکورہ افسر نے اپنی ملازمت کے دوران اپنے نام اور اپنے اہلخانہ کے نام پر معلوم آمدن سے کہیں زیادہ منقولہ و غیر منقولہ جائیدادیں حاصل کی ہیں۔
ان کا کہنا ہے کہ تحقیقات کے دوران معلوم ہوا کہ ملزم اور اس کے اہلخانہ کے پاس ایسے کئی اثاثے ہیں جنہیں ان کی معلوم آمدنی کے ذرائع سے درست نہیں ٹھہرایا جا سکتا ہے ۔
بیان کے مطابق شناخت شدہ اثاثوں میں ضلع بڈگام میں تقریباً ۳۲کنال۶مرلہ اراضی جس میں۱۷کنال ۱۴مرلہ اراضی شاہ پورہ واتھورہ میں ہے ، اومپورہ کالونی بڈگام میں واقع دو منزلہ عالی شان رہائشی مکان، مختلف بینک کھاتوں میں کل تقریباً۴۸لاکھ۲۶ہزار۳۶روپیوں کی رقم، ملزم اور اس کے اہلخانہ کے نام پر متعدد گاڑیاں، بچوں کی اعلیٰ تعلیمی اداروں میں تعلیم پر تقریباً ۴۰لاکھ روپیوں کا خرچہ اور بیرون ملک سفر اور انشورنس پریمیمز پر بھاری اخراجات شامل ہیں۔
پولیس ترجمان نے بتایا کہ بینک ریکارڈ کے معائنے میں کئی مشکوک لین دین اور غیر واضح نقدی جمع ہونے کے شواہد ملے ہیں اور یہ بھی دیکھا گیا کہ ملزم اور اس کے اہلخانہ نے مختلف بینکوں میں متعدد بینک کائونٹ کھولے ہیں اور اس کے علاوہ متعدد غیر منقولہ جائیدادیں بھی اس کی اہلیہ اور بچوں کے نام پر حاصل کی گئی ہیں۔
انہوں نے کہا کہ آمدنی اور اخراجات کے تقابلی جائزے سے ظاہر ہوتا ہے کہ یکم جنوری۲۰۱۲سے۳۰جون۲۰۲۵تک کے عرصے میں ملزم کی معلوم آمدنی ان کے حاصل کردہ اثاثوں اورخرچ کی گئی رقم کے لحاظ سے انتہائی ناکافی تھی۔
ترجمان کا کہنا تھا کہ تحقیقات سے یہ ثابت ہوا ہے کہ ملزم نے بد عنوان اور غیر ایماندارانہ ذرائع سے ناجائز دولت حاصل کی ہے جو انسداد بد عنوانی ایکٹ۱۹۸۸(ترمیم شدہ ۲۰۱۸) کی متعلقہ دفعات کے تحت قابل سزا جرم ہے لہذا مذکورہ ایکٹ کے تحت ایف آئی آر نمبر۲۰۲۵/۲۰میں مذکورہ سرکاری ملازم کے خلاف مقدمہ درج کیا گیا۔
ترجمان نے بتایا کہ ایف آئی آر درج ہونے کے فوراً بعد عدالتی حکم مورخہ۱۰؍اکتوبر ۲۰۲۵کی تعمیل میں ضلع بڈگام میں ملزم کے دو رہائشی مکانوں پر چھاپے مارے گئے ۔
انہوں نے کہا کہ ملزم کو گرفتار کرکے تفتیش کیلئے پولیس تحویل میں لیا گیا ہے اس ضمن میں مزید تحقیقات جاری ہے
ایجنسیز
