بڈگام میں کئی مقامات پر جماعت اسلامی کے ارکان کے گھروں پر چھاپے :پولیس

سرینگر/۸؍اکتوبر
پولیس کا کہنا ہے کہ غیر قانونی سرگرمیوں میں ملوث عناصر کے خلاف کارروائیوں کو جاری رکھتے ہوئے وسطی ضلع بڈگام میں کئی مقامات پر کالعدم تنظیم جماعت اسلامی سے وابستہ افراد کے گھروں پر چھاپے مارے گئے ۔
ایک پولیس ترجمان نے کہا کہ یہ چھاپے سویہ بگ اور چاڈورہ علاقوں میں ان افراد کے رہائشی مکانوں پر مارے گئے جو اس کالعدم تنظیم سے وابستہ بتائے جا رہے ہیں۔
ترجمان نے بتایا کہ یہ کارروائیاں جاری تحقیقات کے سلسلے میں انجام دی گئیں تاکہ ان فراد کی ممکنہ شمولیت کا پتہ لگایا جا سکے جن کی سرگرمیوں سے امن عامہ اور نظم و ضبط میں خلل پڑنے کا اندیشہ ہو۔
انہوں نے کہا کہ یہ آپریشن بڈگام پولیس کے اس پیش قدمانہ اپروچ کی عکاسی کرتا ہے جس کے تحت وہ دہشت گردی کے نظام سے منسلک نیٹ ورکس کو ختم کرنے اور ضلع میں امن و امان کو متاثر کرنے کی کسی بھی کوشش کو ناکام بنانے کے لئے سرگرم ہے ۔
ترجمان کا مزید کہنا ہے کہ بڈگام پولیس امن، سلامتی اور قانون کی حکمرانی کو یقینی بنانے کے لئے پر عزم ہے اور کسی بھی فرد یا گروہ جو عوامی سلامتی اور خطے کے استحکام کے خلاف سرگرمیوں میں ملوث ہوں، کے خلاف سخت کارروائی کی جائے گی۔
ریاستی تحقیقاتی ایجنسی (ایس آئی اے ) نے یو اے پی اے کے تحت درج ایک کیس کی تحقیقات کے سلسلے میں بدھ کی صبح کشمیر کے مختلف اضلاع میں متعدد مقامات پر چھاپے مار کارروائیاں انجام دیں۔
حکام نے بتایا کہ پولیس اور سی آر پی ایف کے ساتھ ایس آئی اے کے اہلکاراننت ناگ، شوپیان، کولگام، سوپور اور بانڈی پورہ اضلاع میں بیک وقت چھاپے مار کارروائیاں انجام دے رہے ہیں۔
انہوں نے کہا کہ یہ تلاشی کارروائیاں یو اے پی اے کے تحت ایک کیس کی تحقیقات کے سلسلے میں مارے جا رہے ہیں۔تاہم فی الوقت اس ضمن میں کسی قسم کی گرفتاری یا بر آمدگی کی کوئی اطلاع نہیں ہے ۔