گنپت یار جبہ کدل میں آتشزدگی میں کم از کم ۵مکانات خاکستر

ایجنسیز
سرینگر/۷؍اکتوبر
سرینگر کے حبہ کدل گنپت یار کے گنجان آبادی والے علاقے میں منگل کی صبح آتشزدگی کے ایک ہولناک واقعے میں کم سے کم۵رہائشی مکان خاکستر ہوگئے ۔
ذرائع نے بتایا کہ حبہ کدل گنپت یار کے گنجان آبادی والے علاقے میں منگل کی صبح ایک مکان سے آگ نمودار ہوئی جس کے شعلوں نے متصل واقع مکانوں کو اپنی زد میں لے لیا۔
ذرائع نے کہا کہ آگ کی وجہ سے علاقے میں خوف و ہراس کا ماحول پھیل گیا اور اس کے شعلوں اور دھوئیں کو دور دور سے دیکھا جا سکتا تھا۔
محکمہ فائر اینڈ ایمرجنسی کے ایک عہدیدار نے واقعے کی تصدیق کرتے ہوئے بتایا کہ آگ کے بارے میں اطلاع موصول ہوتے ہی نزدیکی فائر اسٹیشنوں سے فائر ٹنڈرس کو جائے موقع پر بھیج دیا گیا۔
عہدیدار نے کہا کہ چونکہ یہ گنجان آبادی والا علاقہ ہے لہذا عملے کو آگ کو محدود اور قابو کرنے میں سخت دشواریوں کا سامنا کرنا پڑا۔
ان کا کہنا ہے کہ آگ کے اس واقعے میں۵رہائشی مکانوں کو شدید نقصان ہوا۔ عہدیدار نے بتایا کہ آگ لگنے کی وجوہات معلوم کی جا رہی ہیں۔ انہوں نے کہا کہ تاہم خوش قسمتی یہ ہے کہ اس واقعے میں کسی جانی نقصان کی کوئی اطلاع نہیں ہے ۔