’گمراہ کن‘ معلومات پھیلانے پر فیس بک پیج کے منتظم کیخلاف مقدمہ درج

سرینگر/۶؍اکتوبر
پولیس کا کہنا ہے کہ سوشل میڈیا پر جھوٹی اور گمراہ کن معلومات پھیلانے پر’کشمیر اسپیکس‘کے عنوان سے ایک فیس بک پیج کے منتظم کے خلاف مقدمہ درج کیا گیا۔
ایک پولیس ترجمان نے پیر کو بتایا کہ سوشل میڈیا پر جھوٹی اور گمراہ کن معلومات پھیلانے پر’کشمیر اسپیکس‘کے عنوان سے ایک فیس بک پیج کے منتظم کے خلاف ایف آئی آر درج کی ہے ۔
ترجمان نے کہا کہ پہلے۲۶؍اگست ۲۰۲۵کو، پولیس اسٹیشن خانصاحب نے رکھائی علاقے میں ایک گھوڑے کے مارنے کے متعلق بی این ایس کے دفعہ۳۲۵ کے تحت ایک ایف آئی آر نمبر۲۰۲۵/۱۶۵ایک مقدمہ درج کیا۔
پولیس ترجمان نے کہا کہ تاہم‘۵؍ اکتوبر۲۰۲۵کو، یہ معلوم ہوا کہ مذکورہ فیس بک پیج نے جھوٹی معلومات شائع کی تھی جس میں الزام لگایا گیا تھا کہ آریزال مارکیٹ میں اس کا گوشت بیچنے پر گھوڑے کو مار دیا گیا تھا جس سے مقامی آبادی میں غیر ضروری خوف اور سنسنی پھیل گئی۔
ان کا کہنا ہے کہ اس پر پولیس اسٹیشن خانصاحب میں بی این ایس کے دفعہ(۲)۳۵۲کے تحت زیر ایف آئی آر نمبر۲۰۲۵/۱۸۷درج کیا گیا اور تحقیقات شروع کی گئی۔
پولیس بیان میں کہا گیا کہ بڈگام پولیس عوامی اور سوشل میڈیا کے صارفین سے غیر تصدیق شدہ اور غلط معلومات کو شیئر کرنے یا پھیلانے سے باز رہنے کی اپیل کرتی ہے جس سے عوامی امن و امان میں خلل پڑ سکتا ہے ۔
ترجمان نے کہا کہ اس طرح کی سرگرمیوں میں ملوث پائے جانے والوں کے خلاف سخت قانونی کارروائی کی جائے گی۔ایجنسیز