بھارت اپنے شہریوں اور سالمیت کے تحفظ کیلئے ہر سرحد پار کرے گا:وزیرِ دفاع

سرینگر/۳؍ اکتوبر
وزیرِ دفاع راج ناتھ سنگھ نے جمعہ کو کہا کہ این ڈی اے حکومت نے ۲۰۱۶ کی سرجیکل اسٹرائیک،۲۰۱۹ کی بالا کوٹ ایئر اسٹرائیک اور حالیہ آپریشن سندور کے ذریعے یہ ثابت کر دیا ہے کہ ملک اپنے شہریوں کے تحفظ اور قومی وحدت و سالمیت کے دفاع کیلئے جب بھی ضرورت پڑی، کسی بھی سرحد کو پار کر سکتا ہے۔
یہ بات راج ناتھ نے حیدر آباد میں جین انٹرنیشنل ٹریڈ آرگنائزیشن (جے آئی ٹی او) کے زیر اہتمام ’جیتو کنیکٹ‘ پروگرام سے خطاب کرتے ہوئے کہی۔
وزیر دفاع نے کہا کہ پہلگام دہشت گردانہ حملے میں معصوم لوگوں کو صرف ان کے مذہب کی بنیاد پر نشانہ بنایا گیا، لیکن بھارت نے پاکستان کے خلاف جوابی کارروائی میں مذہب نہیں دیکھا۔
راج ناتھ سنگھ نے کہا’’ہماری حکومت نے صرف دہشت گرد مراکز کو نشانہ بنایا تاکہ پہلگام حملے کے ذمہ داروں کو سزا دی جا سکے۔ ہم نے کبھی کسی فوجی یا سول تنصیب پر حملہ نہیں کیا۔ اگر ہم چاہتے تو ایسا پہلے بھی کر سکتے تھے، مگر ہم نے ایسا نہیں کیا‘‘۔
وزیرِ دفاع کے مطابق مرکزی حکومت کی توجہ فوجی اور معاشی طاقت کو بڑھانے پر ہے، مگر اس کا مقصد غلبہ حاصل کرنا نہیں بلکہ ان اقدار کا تحفظ ہے جو مذہب، ایمان اور انسانی اصولوں میں مضمر ہیں اور جو بھگوان مہاویر کی تعلیمات میں جھلکتے ہیں۔
راج ناتھ نے کہا’’جب بات بھارت کے وقار اور عظمت کی آتی ہے تو ہم نے کبھی سمجھوتہ نہیں کیا۔ چاہے ۲۰۱۶ کی سرجیکل اسٹرائیک ہو‘۲۰۱۹ کی ایئر اسٹرائیک یا۲۰۲۵ کا آپریشن سندور …ہم نے ثابت کیا کہ بھارت اپنی وحدت، سالمیت اور ہر شہری کی جان کے تحفظ کے لیے جب ضرورت پڑے، ہر سرحد پار کرے گا‘‘۔
دفاعی برآمدات کے بارے میں بات کرتے ہوئے راج ناتھ سنگھ نے کہا کہ جب این ڈی اے حکومت نے اقتدار سنبھالا تھا تو ملک کی دفاعی برآمدات تقریباً ۶۰۰ کروڑ روپے تھیں، جو اب بڑھ کر۲۴ ہزار کروڑ روپے سے تجاوز کر چکی ہیں۔انہوں نے اندازہ ظاہر کیا کہ ۲۰۲۹ تک یہ رقم ۵۰ ہزار کروڑ روپے سے اوپر پہنچ جائے گی۔
خود انحصاری کی سمت میں تیز رفتار پیش رفت کا ذکر کرتے ہوئے انہوں نے کہا کہ بیرونی ممالک پر انحصار مسلسل کم ہو رہا ہے۔حکومت نے ہندوستان ایروناٹکس لمیٹڈ (ایچ اے ایل) کے ساتھ۹۷لائٹ کامبیٹ ایئرکرافٹ خریدنے کا معاہدہ بھی کیا ہے۔
وزیر دفاع نے وزیرِ اعظم نریندر مودی کے نعروں ’لوکل فار گلوبل‘ اور’ووکل فار لوکل‘کا حوالہ دیتے ہوئے کہا’’آج ملک کھلونوں سے لے کر ٹینک تک، ہر طرح کی اشیاء خود تیار کر رہا ہے۔ بھارت تیزی سے دنیا کا مینوفیکچرنگ حب بننے کی طرف بڑھ رہا ہے، وہ دن دور نہیں جب بھارت دنیا کی فیکٹری کے طور پر ابھرے گا‘‘۔
راج ناتھ سنگھ نے کہا کہ ۲۰۳۰ تک بھارت تیسری بڑی معیشت بننے کی راہ پر گامزن ہے، جس کا متوقع جی ڈی پی ۳ء۷ کھرب امریکی ڈالر تک پہنچ جائے گا۔انہوں نے جین برادری کی قومی ترقی میں خدمات کو سراہتے ہوئے کہا’’اگرچہ جین برادری ملک کی کل آبادی کا صرف۵ء۰ فیصد ہے، مگر ان کے ٹیکسوں کا حصہ مجموعی ٹیکس وصولیوں کا تقریباً ۲۴ فیصد ہے‘‘۔
وزیر دفاع نے مزید کہا’’چاہے فارما، ایوی ایشن یا تعلیم کا شعبہ ہو، جین برادری نظم و ضبط اور اقدار پر مبنی طرزِ زندگی کی بدولت ہمیشہ آگے رہی ہے‘‘۔
تقریب میں مرکزی وزیر برائے کوئلہ جی کشن ریڈی، تلنگانہ کے وزیر برائے صنعت و آئی ٹی ڈی سریدھر بابو اور ریاستی بی جے پی صدر این رام چندر راؤ بھی شریک ہوئے۔ (ایجنسیاں)ویب ڈیسک