کشمیر اورجموں صوبوں میں اسکولوں کے اوقات کار میں تبدیلی

سرینگر/۳۰ ستمبر
حکام نے منگل کو کشمیر ڈویڑن میں سرکاری اور تسلیم شدہ نجی تعلیمی اداروں کے اوقات کار میں تبدیلی کا حکم جاری کیا۔
ڈائریکٹوریٹ آف اسکول ایجوکیشن کشمیر کی طرف سے جاری حکم نامے کے مطابق، سرینگر میونسپل حدود کے اندر واقع اسکول اب صبح ۹ بجے سے دوپہر ۳ بجے تک کام کریں گے، جبکہ میونسپل حدود کے باہر اور دیگر اضلاع میں قائم اسکولوں کے اوقات کار صبح۱۰ بجے سے شام ۴ بجے تک مقرر کیے گئے ہیں۔
ڈائریکٹر جنرل اسکول ایجوکیشن کشمیر نے تمام اداروں کو سختی سے اس حکم کی تعمیل کرنے کی ہدایت دی ہے۔
ادھرڈائریکٹوریٹ آف سکول ایجوکیشن جموں نے ڈویژن بھر کے سرکاری اور پرائیویٹ سکولوں کیلئے نئے اوقات کار کا اعلان کیا ہے ۔
محکمے کی طرف سے منگل کو جاری ایک حکم نامے میں کہا گیا ہے کہ اکتوبر سے گرمائی زون میں اسکول صبح۹بجے سے سہ پہر۳بجے تک کام کریں گے جبکہ نومبر مہینے سے اسکولوں کے اوقات صبح۳۰:۹بجے سے سہ پہر۳۰:۳بجے تک ہوں گے تاہم، جموں میونسپل کارپوریشن کی حدود اور قریبی شہری علاقوں میں آنے والے اسکول صبح۹بجے سے سہ پہر۳بجے تک کھلے رہیں گے ۔
محکمہ نے کہا کہ سرمائی زون میں یکم اکتوبر سے اسکول صبح۳۰:۹بجے سے۳۰:۳بجے سہ پہر تک کام کریں گے ۔
محکمہ نے خبردار کیا ہے کہ حکم کی خلاف ورزی کرنے والے اداروں کے خلاف سخت کارروائی کی جائے گی۔ندائے مشرق خبر