جموں:منشیات کا نیٹ ورک تباہ، میاں بیوی سمیت۳ گرفتار

جموں/۲۳ستمبر
جموں پولیس نے منشیات کے ایک بڑے نیٹ ورک کا پردہ فاش کرکے میاں بیوی سمیت تین منشیات فروشوں کو گرفتار کیا ہے اور ان کی تحویل سے بڑی مقدار میں ہیروئن بر آمد کی ہے ۔
ایک پولیس ترجمان نے اپنے ایک بیان میں کہا کہ جموں پولیس (سائوتھ زون) نے ریلوے پلی نروال پر چیکنگ کے دوران وشال ولد اجے ساکن لدھیانہ حال راجیو نگر کو گرفتار کیا ہے ۔
ترجمان نے کہا کہ تلاشی کے دوران اس کی تحویل سے۲۶۵گرام ہیروئن اور وزن کرنے والی ایک الیکٹرانک مشین بر آمد کی گئی۔
ترجمان نے بتایا کہ بعد ازاں تحقیقات کے دوران مزید دو ملزموں کو گرفتار کیا گیا جو کہ میاں بیوی ہیں۔ان کی شناخت گوگی ولد نیپ رام ساکن راجیو نگر نروال اور ریما زوجہ گوگی ساکن راجیو نگر نروال کے طور پر ہوئی ہے ۔
پولیس ترجمان نے کہا کہ تلاشی کے دوران ان کے قبضے سے۱۵گرام ہیروئن اور ایک وزن کرنے والی مشین بر آمد کی گئی۔
بیان میں کہا گیا کہ اس ضمن میں پولیس اسٹیشن باہو فوڑ میں این ڈی پی ایس ایکٹ کے تحت زیر ایف آئی آر نمبر۲۰۲۵/۲۷۰؍ایک مقدمہ درج کیا گیا اور مزید تحقیقات شروع کی گئی۔
ترجمان نے کہا کہ یہ کارروائی سب ڈویژن ایسٹ کی جانب سے راجیو نگر، قاسم نگر جیسے حساس علاقوں میں جاری منشیات مخالف مہم کا حصہ ہے جس نے گذشتہ ۸مہینوں میں قابل ذکر کامیابیاں حاصل کی ہیں۔
بیان میں کہا گیا کہ اس دوران این ڈی پی ایس ایکٹ کے تحت۳۱مقدمات درج کئے گئے ہیں اور ایک کلو۱۸۳گرام ہیروئن (جس کی بین الاقوامی مارکیٹ میں قیمت۲سے۳کروڑ روپے ہیں) اور۱۰کلو گانجہ ضبط کیا گیا جبکہ ۳۵ملزموں کو گرفتار اور۲۲۰؍افراد کے خلاف انسدادی کارروائیاں انجام دی گئی۔ایجنسی