تین سال سے مفرور بدنام زمانہ منشیات اسمگلر کو گرفتار

سرینگر/۱۷ستمبر
ریاستی تحقیقاتی ایجنسی (ایس آئی اے ) نے منشیات اور دہشت گردی سے جڑے ایک کیس کے سلسلے میں تین برس سے مفرور ایک اہم اسمگلر کو گرفتار کر لیا ہے ۔
گرفتاراسمگلر کی شناخت ظفران خان ولد شفیع اللہ خان، ساکن مہرا اوڑی ضلع بارہمولہ کے طور پر کی گئی ہے ، جسے ایس آئی اے کی ایک خصوصی ٹیم نے ضلع کٹھوعہ میں کامیاب چھاپہ مار کارروائی کے دوران دھر دبوچا۔
ایس آئی اے کے مطابق ظفران خان پاکستان میں بیٹھے دہشت گرد ہینڈلرز کی پشت پناہی والے ایک نارکو-ٹیرر ماڈیول کا اہم رکن تھا جو لائن آف کنٹرول (ایل او سی) اوڑی سیکٹر کے راستے منشیات کی اسمگلنگ میں ملوث رہا ہے ۔ ان منشیات کو وادی اور جموں خطے میں منتقل کر کے فروخت کیا جاتا تھا اور حاصل شدہ رقم دہشت گردی کی مالی معاونت کے لیے استعمال کی جاتی تھی۔
یہ گرفتاری ایف آئی آر نمبر۲۰۲۲/۱۳کے تحت درج ایک کیس سے جڑی ہے جس میں ایک کلو ہیروئن‘۷کلو پوست کی اور۴کلو پوست کے بیج برآمد ہوئے تھے ۔ اس کیس میں اب تک ماڈیول کے پانچ ارکان کے خلاف یو اے پی اے ایکٹ اور این ڈی پی ایس ایکٹ کے تحت چارج شیٹ داخل کی جا چکی ہے ۔
ایس آئی اے کشمیر نے گزشتہ کئی مہینوں کے دوران نارکو،ٹیرر نیٹ ورکس کے خلاف اپنی کارروائیاں تیز کر دی ہیں۔ محض گزشتہ ہفتے ہی ایجنسی نے دو برس سے زیادہ عرصے سے مفرور ایک اور بدنام زمانہ دہشت گرد ہینڈلر عبدالرشید بٹ کو پلوامہ سے گرفتار کیا تھا۔
ایجنسی نے بیان میں کہا ہے کہ یہ کارروائیاں اس بات کا ثبوت ہیں کہ ایس آئی اے کشمیر دہشت گردی کے پورے ایکوسسٹم کو ختم کرنے کے لیے پُر عزم ہیں۔ایجنسیز