پالپورہ نور باغ میں آتشزدگی چار رہائشی شیڈ اور ایک مکان خاکستر

سرینگر/۱۳ستمبر
پائین شہر کے گنجان آباد علاقے پالپورہ نور باغ میں ہفتے کی شام پانچ بجے آتشزدگی کے ایک واقعے میں چار رہائشی شیڈ اور ایک مکان جل کر خاکستر ہو گئے ۔
فائر اینڈ ایمرجنسی سروسز کے مطابق آگ پر قابو پانے کے لیے دس فائر ٹینڈرز اور اہلکار موقع پر فوری طور پر پہنچے اور آگ کو مزید پھیلنے سے روکا گیا۔
مقامی لوگوں نے بتایا کہ آگ نے چند لمحوں میں اپنے متصل کئی ڈھانچوں کو لپیٹ میں لے لیا، جس کے نتیجے میں لاکھوں روپے مالیت کی گھریلو اشیاء راکھ کے ڈھیر میں تبدیل ہو گئیں۔
فائر اینڈ ایمرجنسی کے عہدیدار نے یو این آئی کو بتایا کہ آگ لگنے کی اطلاع ملتے ہی فوراً عملے کو الرٹ کیا گیا اور موقع پر پہنچ کر فوری کنٹرول کی کوشش کی گئی۔ انہوں نے کہا کہ آگ لگنے کی اصل وجوہات جاننے کے لیے مقدمہ درج کر کے تحقیقات شروع کر دی گئی ہیں۔
عینی شاہدین نے بتایا کہ مقامی افراد نے بھی آگ پر قابو پانے میں حصہ لیا اور فائر بریگیڈ کے اہلکاروں کے ساتھ مل کر قریبی مکانات کو نقصان سے بچانے کی کوشش کی۔ انہوں نے بتایا کہ اگر بروقت کارروائی نہ کی جاتی تو آگ کے اثرات مزید وسیع علاقے تک پہنچ سکتے تھے ، جس سے جائیداد کا بڑا نقصان ہوسکتا تھا۔
دریں اثنا پولیس نے آگ لگنے کی وجوہات جاننے کی خاطر کیس درج کرکے تحقیقات شروع کی ہے ۔ایجنسیز