انڈ و پاک کرکٹ میچ پر پوری ریاست میں احتجاج کیا جائیگا: اودھو ٹھاکرے

ممبئی، 13 ستمبر (یو این آئی) شیوسینا نے 14 ستمبر کو ہونے والے ہندوستان-پاکستان ایشیا کپ کرکٹ میچ کے انعقاد کے معاملے میں بی جے پی اور بی سی سی آئی کو تنقید کا نشانہ بناتے ہوئے شیوسینا (یو بی ٹی) کے سربراہ ادھو ٹھاکرے نے پورے مہاراشٹر میں احتجاج کئے جانے کا اعلان کیا۔
اپنی رہائش گاہ پر پریس کانفرنس سے خطاب کرتے ہوئے ٹھاکرے نے کہا کہ پاکستان کے ساتھ کرکٹ میچ کھیلنا قومی جذبات کی توہین ہے کیونکہ ہمارے ملک کے فوجی سرحدوں پر اپنی جانوں کا نذرانہ پیش کر رہے ہیں اور حکومت انڈو پاک میچ کا انعقاد کروارہی ہے نیز ہمارا احتجاج دہشت گردی کے خلاف ہمارا موقف دنیا کو پہنچانے کا موقع ہے ۔انہوں نے یہ بھی کہا کہ یہ کرکٹ میچ قومی جذبات کی توہین ہے ۔
کیا ہمیں پاکستان کے ساتھ کرکٹ کھیلنی چاہیے جب کہ ہمارے فوجی سرحدوں پر اپنی جانیں قربان کر رہے ہیں؟ ٹھاکرے نے دریافت کیا۔
ی جے پی رہنماؤں کے اس بیان کا جواب دیتے ہوئے کہ ماضی میں پاکستانی کرکٹر جاوید میاں داد نے ٹھاکرے خاندان کی ممبئی کی رہائش گاہ ماتوشری کا دورہ کیا تھا اور سینا کے بانی بال ٹھاکرے سے ملاقات کی تھی، ادھو نے کہا، "میرے والد نے جاوید میاں داد سے کہا تھا کہ جب تک پاکستان کی جانب سے ہندوستان میں دہشت گردانہ کارروائیاں جاری رہیں گی تب تک انڈوپاک میچ کا انعقاد نہیں ہوگا۔”
بی جے پی زیرقیادت مرکزی حکومت پر تنقید کرتے ہوئے ٹھاکرے نے کرکٹ میچ کو حب الوطنی کا مذاق قرار دیا۔