مودی نے منی پور میں 8,500 کروڑ روپے کے منصوبوں کا سنگ بنیاد رکھا اور افتتاح کیا

امپھال، 13 ستمبر (یو این آئی) وزیر اعظم نریندر مودی نے ہفتہ کو منی پور کے اپنے ایک روزہ دورے کے دوران 8,500 کروڑ روپے کے ترقیاتی پروجیکٹوں کا سنگ بنیاد رکھا اور افتتاح کیا۔
انہوں نے منی پور میں دو عوامی جلسوں سے خطاب کیا، پہلے سرحدی ضلع چورا چند پور اور پھر دارالحکومت امپھال میں۔
مسٹر مودی نے ریاست میں مئی 2023 کے نسلی تشدد کے بعد ریاست کے اپنے پہلے دورے میں جامع، پائیدار اور ہمہ گیر ترقی کے حکومت کے عزم کے مطابق چورا چند پور میں اسٹیج سے ریموٹ کنٹرول کے ذریعے 7,300 کروڑ روپے سے زیادہ کے 19 پروجیکٹوں کے سنگ بنیاد کی تختیوں کی نقاب کشائی کی۔ ان پروجیکٹوں میں شہری سڑکیں، نکاسی آب اور اثاثہ جات کے انتظام میں بہتری کے منصوبے 3,600 کروڑ روپے سے زیادہ، 2,500 کروڑ روپے سے زیادہ کے پانچ قومی شاہراہ کے منصوبے ، منی پور انفوٹیک ڈیولپمنٹ پروجیکٹ اور نو مقامات پر کام کرنے والی خواتین کے لیے ہاسٹل شامل ہیں۔
دوپہر 2.30 بجے وزیر اعظم نے راجدھانی امپھال میں 1,200 کروڑ روپے سے زیادہ کے کئی ترقیاتی پروجیکٹوں کا افتتاح کیا۔ ان میں منتری پکھری میں سول سیکرٹریٹ، آئی ٹی ایس ای زیڈ بھون اور منتری پوکھری میں نیا پولیس ہیڈکوارٹر، دہلی اور کولکتہ میں منی پور بھون، اور خواتین کے لیے منفرد بازار، چار اضلاع میں آئیما مارکیٹ شامل ہیں۔
انہوں نے ان پروجیکٹوں میں ہائی وے ڈیولپمنٹ اور انفوٹیک پروجیکٹس پر خصوصی زور دیا اور کہا کہ آج شروع کیے گئے پروجیکٹ منی پور کے لوگوں کی زندگی کو آسان بنائیں گے ، انفراسٹرکچر کو مضبوط کریں گے اور نوجوانوں کے لیے روزگار کے نئے مواقع پیدا ہوں گے ۔