آن لائن فراڈ کرنے والے میاں – بیوی دہلی سے گرفتار

نئی دہلی، 12 ستمبر (یواین آئی) چنئی سائبر کرائم پولیس کی اطلاع پر دہلی پولس کی کرائم برانچ نے بڑی کارروائی کرتے ہوئے آن لائن فراڈ میں ملوث میاں بیوی کو گرفتار کیا ہے ۔ الزام ہے کہ دونوں نے مل کر تقریباً 1.79 کروڑ روپے کی دھوکہ دہی کی تھی۔
کرائم برانچ کے ڈپٹی کمشنر سنجیو کمار یادو نے بتایا کہ 9 ستمبر کو چنئی سائبر کرائم پولیس کی ٹیم دہلی میں اے ای سی کرائم برانچ کے دفتر پہنچی اور مدد کی اپیل کی۔ پولیس نے بتایا کہ ملزم جوڑے رنجنا موریہ اور شیوانند موریہ کے نام سے وہ بینک اکاؤنٹ چل رہا تھا جس میں ٹھگی کی رقم جمع کی گئی تھی۔ دونوں کے خلاف اشوک نگر، چنئی پولس تھانے میں معاملہ درج تھا اور وہ کافی عرصے سے مطلوب تھے ۔
کیس کی سنگینی کے پیش نظر فوری طور پر مشترکہ ٹیم تشکیل دی گئی۔ ٹیم کی قیادت انسپکٹر دلیپ کمار کر رہے تھے ، جبکہ اے سی پی پنکج اروڑہ کی نگرانی میں دہلی اور تمل ناڈو پولیس نے مشترکہ طور پر اس جگہ پر چھاپہ مارا۔ چھاپے کے دوران دونوں ملزمان کو ان کے گھر اور کام کی جگہ سے گرفتار کیا گیا۔
پوچھ گچھ کے دوران دونوں نے بتایا کہ میرٹھ کا رہنے والا عمران نامی شخص ان کا جاننے والا ہے ۔ اس کی درخواست پر رنجنا موریہ کا بینک اکاؤنٹ دستیاب کرایا گیا۔ عمران نے اس اکاونٹ میں پانچ لاکھ روپے جمع کرائے جو نکال کر اسے دے دیے گئے ۔ اکاؤنٹ استعمال کرنے کے عوض ملزم جوڑے کو ایک لاکھ روپے ملے ۔ پولیس نے عمران کی تلاش میں میرٹھ میں بھی چھاپہ مارا، لیکن وہ فرار ہوگیا۔
ملزمین کی شناخت رنجنا موریہ اور شیوانند موریہ کے طور پر ہوئی ہے جو جھروڈا کے رہنے والے ہیں۔ رنجنا بنیادی طورپر حیدرآباد کی رہائشی ہے اور اس نے 12ویں تک تعلیم حاصل کی ہے جب کہ شیوانند کا تعلق اتر پردیش سے ہے ۔
گرفتار دونوں کو عدالت میں پیش کیا گیا، جہاں سے انہیں چنئی کی عدالت میں پیش کرنے کے لیے 12 ستمبر تک ٹرانزٹ ریمانڈ پر بھیج دیا گیا ہے