منشیات کے خلاف بڑی کارروائی میں چار گرفتار

نئی دہلی، 10 ستمبر (یو این آئی) دہلی پولیس کی شمال مغربی ضلع کی ٹیم نے دو الگ الگ کارروائیوں میں چار ملزمین کو گرفتار کرکے منشیات کے کاروبار کو بڑا دھچکا دیا ہے ۔ پولیس نے کل 21.20 کلو گرام گانجہ اور 11.22 گرام اسمیک برآمد کی ہے ۔ گرفتار ملزمان میں دو گانجہ سپلائی کرنے والے ، ایک خریدار اور ایک بدنام اسمیک سپلائیر والا شامل ہے ۔
ڈپٹی کمشنر بھیشما سنگھ نے آج بتایا کہ یکم ستمبر کو گشت کے دوران پولیس ٹیم نے اسکوٹی پر سوار دو مشکوک نوجوانوں کو روکنے کی کوشش کی۔ دونوں بھاگنے لگے لیکن پولیس نے پیچھا کرکے انہیں پکڑ لیا۔ تلاشی کے دوران ان کے بیگ سے 21.20 کلو گرام گانجہ برآمد ہوا۔ ملزمان کی شناخت منیش پرساد (21) اور کشن (19) کے طور پر کی گئی ہے ۔ دونوں پہلے بھی این ڈی پی ایس ایکٹ کیس میں ملوث پائے گئے تھے ۔ پوچھ گچھ کے دوران یہ بات سامنے آئی کہ گانجہ تری نگر کے رام کمار (35) کو فراہم کیا جانا تھا۔ بعد ازاں پولیس نے کئی دنوں کی تلاش کے بعد اسے گرفتار کرلیا۔ برآمد اسکوٹی شدہ بھی اسی کی تھی۔ نو ستمبر کو شالیمار باغ پولیس اسٹیشن نے حیدر پور علاقے سے بدنام زمانہ مجرم راہل عرف چُروا (24) کو گرفتار کیا۔ اس کے پاس سے 11.22 گرام اسمیک برآمد کی۔ تفتیش سے پتہ چلا کہ راہل ایک اشتہاری مجرم ہے اور اس سے قبل قتل، ڈکیتی، اسنیچنگ اور چوری جیسے 16 سنگین جرائم میں ملوث رہا ہے ۔ پولیس کا کہنا ہے کہ وہ عرصہ دراز سے اسمیک سپلائی کے دھندے میں سرگرم تھا اور گاہکوں کی ڈیمانڈ پر منشیات فراہم کرتا تھا۔ فی الحال گرفتار ملزمان سے مزید تفتیش جاری ہے اور ان کے نیٹ ورک کا پتہ لگایا جا رہا ہے ۔