گاندربل میں مضر صحت گوشت فروخت ‘الزام میں دو افراد گرفتار

وسطی ضلع گاندربل میں پولیس نے عوامی صحت کے تحفظ کو یقینی بنانے کیلئے بروقت کارروائی کرتے ہوئے مضر صحت گوشت اور زائد المیعاد اشیائے خورد و نوش فروخت کرنے والوں کے خلاف دو الگ الگ مقدمات درج کر کے ملزمان کو گرفتار کر لیا ہے ۔
پولیس کے مطابق صفاپورہ کے کوندبل علاقے میں ایک شخص مبینہ طور پر مضر صحت اور غیر معیاری گوشت فروخت کر رہا تھا، جو انسانی استعمال کے لیے انتہائی غیر محفوظ پایا گیا۔ اطلاع ملنے پر پولیس اسٹیشن صفاپورہ کی ایک خصوصی ٹیم نے فوڈ سیفٹی آفیسر اور ایگزیکٹو مجسٹریٹ کے ہمراہ متعلقہ دکان پر چھاپہ مارا۔
اس دوران بڑی مقدار میں ابلا ہوا گوشت (رستہ اور کباب) برآمد ہوا جو فریز کیا گیا تھا اور مکمل طور پر سڑا ہوا پایا گیا۔ اس سلسلے میں ایف آئی آر نمبر۲۰۲۵/۱۴درج کر کے ملزم کو حراست میں لیا گیا ہے ۔
اسی طرح پولیس اسٹیشن گاندربل کو اطلاع ملی کہ بیہامہ میں واقع ہوٹل ‘مٹامل فوڈ سیل پوائنٹ’ میں زائد المیعاد اشیائے خورد و نوش استعمال کی جا رہی ہیں۔ چھاپہ مار کارروائی کے دوران کچن سے بڑی مقدار میں ایکسپائرڈ فوڈ آئٹمز ضبط کیے گئے ۔
اس واقعے پر ایف آئی آر نمبر۲۰۲۵/۱۴۵درج کر کے ملزم کو گرفتار کر لیا گیا۔
پولیس نے کہا ہے کہ عوامی صحت کے ساتھ کھلواڑ کرنے والوں کے خلاف سخت کارروائی جاری رہے گی اور ایسے عناصر کو کسی صورت برداشت نہیں کیا جائے گا۔
گاندربل پولیس نے عوام کو یقین دلایا ہے کہ صحت و سلامتی کو خطرے میں ڈالنے والے عناصر کے خلاف قانون کے تحت سخت سے سخت کارروائی عمل میں لائی جائے گی۔