شوپیاں اور گاندربل سڑک حادثوں میں۹؍ افراد زخمی

نوبی کشمیر کے ضلع شوپیاں کے چھوٹی پورہ علاقے میں پیر کی صبح ایک سڑک حادثے میں چار افراد زخمی ہوگئے ۔
ذرائع نے بتایا کہ شوپیاں کے چھوٹی پورہ علاقے میں پیر کی صبح دو موٹر سائیکلوں کے درمیان زور دار ٹکر ہوگئی جس کے نتیجے میں ان پر سوار چار افراد شدید زخمی ہوگئے ۔انہوں نے کہا کہ زخمیوں کو علاج ومعالجے کیلئے ضلع اسپتال شوپیاں منتقل کیا گیا۔
زخمیوں کی شناخت مختار احمد چوہان ولد محمد حسین چوہان ساکن سڈیو، ہلال احمد میر ولد محمد لطیف میر ساکن چک چھوٹی پورہ، نثار احمد میر ولد محمد اسلم میر ساکن چھوٹی پور اور سہیل شبیر احمد ولد شبیر احمد بٹ ساکن سڈیو کے طور پر ہوئی ہے ۔
دریں اثناوسطی کشمیر کے گاندربل ضلع کے علاقے کجپارہ میں پیر کے روز ایک کار کے اسکول وین سے ٹکرانے سے ایک ہی خاندان کے کم از کم پانچ افراد زخمی ہو گئے۔
سرکاری ذرائع نے ایک مقامی خبر رساں ایجنسی کو بتایا کہ یہ حادثہ آلٹو گاڑی اور اسکول وین کے درمیان پیش آیا۔ آلٹو میں سفر کرنے والے مسافروں کی شناخت بارہمولہ کے سجد احمد میر ، اس کی بیوی آصفہ (۴۸) اور ان کی بیٹیاں سادیہ (۲۲) صافیہ (أ۲) اور زینب (۱۳) کے طور پر ہوئی ہے۔
تمام زخمیوں کو علاج کے لیے سب سب ڈسٹرکٹ ہسپتال کنگن منتقل کر دیا گیا۔ بعد میں ڈاکٹروں نے سادیہ اور زینب کو خصوصی دیکھ بھال کے لیے ایس کے آئی ایم ایس سورا بھیج دیا۔ حادثے میں آلٹو کار کو کافی نقصان پہنچا۔
دریں اثنا پولیس نے اس سلسلے میں ایک کیس درج کرکے کارروائیاں شروع کی ہیں