امر ناتھ یاتریوں کا وادی میں پرتپاک استقبال

سرینگر//
جموں کے بھگوتی نگر بیس کیمپ سے لیفٹیننٹ گورنر منوج سنہا کے ہاتھوں روانہ ہونے والے پہلے قافلے میں شامل یاتریوں کا آج کشمیر پہنچنے پر مختلف مقامات پر شاندار استقبال کیا گیا۔
مقامی انتظامیہ کے ساتھ ساتھ عام شہریوں نے بھی امرناتھ یاترا پر آئے عقیدت مندوں کا والہانہ خیرمقدم کیا۔
پہلے قافلے میں شامل۵۸۹۲یاتری جب قاضی گنڈ کے نیوگ ٹنل کے راستے وادی میں داخل ہوئے تو ضلعی ترقیاتی کمشنر کولگام، ڈپٹی انسپکٹر جنرل پولیس (ساوتھ کشمیر رینج) نے ان کا خیرمقدم کیا۔
بی جے پی کے سینئر لیڈر رویندر رائنا بھی استقبال کرنے والوں میں شامل تھے ، جنہوں نے یاتریوں کو گل دستے ، ہار، مٹھائیاں اور پھول پیش کیے ۔
یاتریوں کے قافلے الگ الگ طور بالہ تل اور پہلگام بیس کیمپوں کی طرف روانہ ہوئے ، جہاں سے وہ کل یعنی جمعرات کو۳۸۸۰میٹر بلند گپھا میں درشن کے لیے روانہ ہوں گے ۔
سرینگر کے نوگام علاقے میں بھی مقامی لوگوں اور حکام نے عقیدت مندوں کا پرجوش خیر مقدم کیا۔
سرکاری اعداد و شمار کے مطابق، اس سال۳۸ روزہ امرناتھ یاترا کا آغاز کل (جمعرات) سے ہونے جا رہا ہے ، جو ۴۸کلومیٹر طویل پہلگام،ننون راستے اور۱۴کلومیٹر چھوٹے لیکن دشوار بالہ تل راستے سے کی جائے گی۔
یاترا۹؍اگست کو اختتام پذیر ہوگی۔اب تک ۳۱ء۳لاکھ یاتریوں نے اس سال کی امرناتھ یاترا کے لیے رجسٹریشن کروائی ہے ۔