جموں میں غیر قانونی طور کھیر کی لکڑی لے جانے والی گاڑی ضبط

جموں//
جموں کشمیر پولیس اور محکمہ جنگلات کے اہلکاروں نے ایک مشترکہ کارروائی میں گھروٹہ علاقے میں کنجر موڑ کے قریب غیر قانونی طور پر کٹی ہوئی کھیر کی لکڑی لے جانے والی ایک گاڑی کو ضبط کیا۔
ایک پولیس ترجمان نے اپنے ایک بیان میں کہا کہ گھروٹہ کی طرف سے آنے والی اسکارپیو گاڑی کو ایک ناکے پر رکنے کا اشارہ کیا گیا۔انہوں نے کہا کہ رکنے کے بجائے ڈائیور نے گاڑی کی رفتار تیز کر دی اور جائے موقع سے فرار ہوا جس پر پولیس نے گاڑی کا پیچھا کیا۔
ان کا کہنا تھا کہ بعد میں ڈرائیور نے گاڑی کو ایک جگہ پر چھوڑ دیا اور خود اندھیرے کا فائدہ اٹھاکر فرار ہو گیا۔
بیان میں کہا گیا کہ معائنہ کرنے پر، افسران کو تقریباً ۱۵سے۲۰کوئنٹل کھیر کی لکڑی سے لدی ایس یو وی ملی، جس کا شبہ ہے کہ تجارتی مقاصد کیلئے غیر قانونی طور پر منتقل کیا گیا تھا۔انہوں نے کہا کہ گاڑی اور لکڑی کو ضبط کرکے قانونی کارروائیاں انجام دینے کیلئے محکمہ جنگلات کے سپرد کیا گیا۔
ان کا کہنا ہے کہ مفرور ڈرائیور کی نشاندہی کرکے اس کو گرفتار کرنے کی کوششیں جاری ہیں۔