آئی جی کشمیر نے سیکورٹی منظر نامے کا لیا جائزہ

سرینگر//
کشمیر زون کے انسپکٹر جنرل آف پولیس وی کے بردی نے جمعرات کے روز پولیس کنٹرول روم (پی سی آر) سرینگر کے کانفرنس ہال میں ایک اعلیٰ سطحی سیکیورٹی جائزہ اجلاس کی صدارت کی، جس میں محرم الحرام، عالمی یومِ یوگا اور آئندہ دیگر اہم تقریبات کے دوران امن و امان کی بحالی اور موثر انتظامات پر تفصیلی غور کیا گیا۔
اجلاس کے آغاز میں افسران نے محرم الحرام کے جلوسوں، مجمع کنٹرول، ٹریفک ریگولیشن، اور امن و قانون کی صورتحال برقرار رکھنے کے لیے ترتیب دی گئی سیکیورٹی پلاننگ سے متعلق تفصیلی بریفنگ دی۔
آئی جی پی کشمیر نے عالمی یوگا ڈے کے موقع پر ہونے والی تقریبات کے لیے سیکیورٹی و لاجسٹک تیاریوں کا بھی جائزہ لیا۔
آئی جی پی وی کے بردی نے افسران کو ہدایت دی کہ:محرم کے جلوسوں، رات کے اجتماعات اور یوگا ڈے کی تقریبات کے دوران فول پروف سیکیورٹی کو یقینی بنایا جائے ،شرپسند عناصر اور مخالف سرگرمیوں پر کڑی نظر رکھی جائے اور سرویلنس بڑھایا جائے ۔
انہوں نے کہا کہ تمام اضلاع میں رُوٹ پلان اور سیکیورٹی اسٹریٹیجی کو بہتر انداز میں مرتب کیا جائے تاکہ کسی بھی ناخوشگوار واقعے سے بچا جا سکے ۔تمام متعلقہ اسٹیک ہولڈرز کے ساتھ کوآرڈینیشن میٹنگز منعقد کر کے باہمی تعاون کو فروغ دیا جائے ۔
اجلاس کے اختتام پر تمام حاضر افسران نے اس بات پر زور دیا کہ محرم، یوگا ڈے اور دیگر آئندہ تقریبات کو پرامن، منظم اور محفوظ ماحول میں منعقد کرانے کیلئے وہ پوری طرح پرعزم ہیں۔