ملازمین کیلئے ڈی اے کو ۵۵ فیصد تک بڑھا دیاگیا

سرینگر//
جموں کشمیر حکومت نے اپنے ملازمین کے لیے مہنگائی الاؤنس(ڈی اے) میں۵۳ سے۵۵ فیصد تک اضافہ کر دیا ہے، جو یکم جنوری۲۰۲۵ سے نافذ ہوگا۔
حکومتی حکم نامے کے مطابق’’حکومتی حکم نمبر۲۸ایف۲۰۲۵ مورخہ۲۷جنوری۲۰۲۵ کے تسلسل میں، یہ حکم دیا جاتا ہے کہ ساتویں پے کمیشن کی سفارشات کے تحت ریگولر پے لیولز پر کام کرنے والے سرکاری ملازمین کو یکم جنوری ۲۰۲۵سے مہنگائی الاؤنس ۵۳ فیصد کی بجائے۵۵ فیصدادا کیا جائے گا‘‘۔
حکم نامے میں واضح کیا گیا ہے ’بنیادی تنخواہ‘ سے مراد ساتویں پے کمیشن کی سفارشات کے مطابق مقررہ پے میٹرکس میں تنخواہ ہے، جس میں کسی دیگر قسم کی تنخواہ جیسے خصوصی الاؤنس وغیرہ شامل نہیں ہے۔
حکم نامے میں کہا گیا ہے کہ جنوری۲۰۲۵سے مئی ۲۰۲۵ تک کے مہنگائی الاؤنس کی اضافی قسط کے اریرز جون۲۰۲۵ میں نقد ادا کیے جائیں گے، اور جون۲۰۲۵ سے یہ ماہانہ تنخواہ کا حصہ بن جائے گا‘‘۔
اس میں یہ بھی واضح کیا گیا ہے ’’مہنگائی الاؤنس کی ادائیگی میں اگر ۵۰ پیسے یا اس سے زیادہ کی کوئی مقدار ہو تو اسے اگلے روپے میں گول کیا جائے گا، جبکہ ۵۰ پیسے سے کم کی مقدار کو نظرانداز کیا جائے گا‘‘۔
یہ اقدام سرکاری ملازمین کو مہنگائی کے اثرات سے نمٹنے میں مدد فراہم کرے گا۔