اودھم پور میں بین ریاستی شراب فروش گرفتار‘شراب ضبط:پولیس

جموں//
سماجی جرائم کے خلاف مہم کو جاری رکھتے ہوئے پولیس نے جموں و کشمیر کے ضلع اودھم پور کے رام نگر علاقے میں ایک بین ریاستی شراب فروش کو گرفتار کرکے اس کی تحویل سے بھاری مقدار میں غیر قانونی شراب ضبط کی ہے ۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ پولیس اسٹیشن رام نگر کی ایک ٹیم نے رام نگر بس اڈے پر ایک ناکے کے دوران ایک گاڑی کو چیکنگ کے لئے روکا۔انہوں نے کہا کہ تلاشی کے دوران گاڑی سے غیر قانونی شراب کے۲۱بکس (ہر بکس میں ۲۹۸بوتلیں ہیں) بر آمد کئے گئے ۔
بیان میں کہا گیا کہ ایک بین ریاستی شراب فروش، جو گاڑی کا ڈرائیور تھا، کو گرفتار کیا گیا جس کی شناخت چنڈی گڑھ کے منے گوپال داد بھائو ولد دادا بھائو منے ساکن پونے کے طور پر کی گئی ہے ۔
انہوں نے کہا کہ اس ضمن میں پولیس اسٹیشن رام نگر میں ایک کیس درج کرکے مزید تحقیقات شروع کی گئی ہے۔