کشمیر میںمزید بارشوں کا امکان:محکمہ موسمیات

سرینگر//
وادی کشمیر میں گذشتہ چوبیس گھنٹوں سے رک رک کر ہلکی سے درمیانی درجے کی بارشوں کا سلسلہ جاری ہے جو اگلے چوبیس گھنٹوں کے دوران جاری رہنے کا امکان ہے ۔
محکمہ موسمیات کے ایک ترجمان کے مطابق سیاحتی مقام گلمرگ میں گذشتہ چوبیس گھنٹوں کے دوران۴ء۵ملی میٹر بارش ریکارڈ ہوئی جبکہ وادی کے ایک اور سیاحتی مقام پہلگام میں۲ء۴ملی میٹر بارش ریکارڈ ہوئی ہے ۔
سرینگر میں اس دوران۸ء۲ملی میٹر اور شمالی ضلع کپواڑہ میں۳ء۵ملی میٹر بارش ریکارڈ ہوئی ہے ۔
ادھر خراب موسمی صورتحال کے پیش نظر حکام نے بانڈی پورہ ، گریز روڈ پر ٹریفک کی نقل و حمل احتیاطا روک دی ہے ۔
وادی کو ملک کے باقی حصوں کے ساتھ جوڑنے والی سری نگر ،جموں قومی شاہراہ پر مسافر بر دار گاڑیوں کی دو طرفہ ٹریفک کی نقل و حمل جاری ہے ۔
ٹریفک حکام نے بتایا کہ قومی شاہراہ پر مسافر بر دار گاڑیوں کی دوطرفہ نقل و حمل جاری ہے تاہم آج یعنی جمعرات کو مال بر دار گاڑیوں کو سری نگر سے جموں جانے کی اجازت ہے ۔انہوں نے مسافروں سے لین ڈسلپن پر عمل کرنے اور اوور ٹیکنگ کرنے سے احتراز کرنے کی اپیل کی ہے ۔
مسافروں سے مزید کہا گیا ہے کہ وہ قومی شاہراہ پر دن کے دوران ہی سفر اختیار کریں نیز چٹانیں کھسک آنے کے خدشات کے پیش نظر رام بن اور بانہال کے درمیان غیر ضروری قیام کرنے سے پرہیز کریں۔
ان کا کہنا ہے کہ سرینگر، لیہہ شاہراہ پر بی آر او کی طرف سے اجازت کے بعد ہی ٹریفک کو بحال کیا جائے گا جبکہ تاریخی مغل روڈ ہنوز بند ہے ۔
محکمہ موسمیات کے مطابق وادی میں۱۰؍اپریل کو موسم ابر آلود رہنے کے ساتھ بیشتر علاقوں میں رک رک کر بارشیں ہوسکتی ہیں جبکہ پہاڑی علاقوں میں ہلکی برف باری بھی متوقع ہے ۔انہوں نے کہا کہ اس دوران کہیں کہیں۳۰ سے۴۰کلو میٹر بھی گھنٹہ رفتار سے تیز ہوائیں بھی چل سکتی ہیں۔
ان کا کہنا ہے کہ۱۱؍اپریل کو بھی موسم ابر آلود رہ سکتا ہے اور اس دوران صبح کے وقت پہاڑی علاقوں میں کہیں کہیں ہلکی برف باری یا بارشوں کا امکان ہے ۔
ترجمان نے بتایا کہ۱۲؍اور۱۷؍اپریل کو وادی میں موسم مجموعی طور پر خشک رہ سکتا ہے ۔بعد ازاں وادی میں۱۸؍سے ۲۰؍اپریل تک موسم ایک بار پھر خراب رہنے کا امکان ہے ۔
محکمے نے اپنی ایڈوئزری میں مسافروں، سیاحوں اور ٹرانسپورٹروں سے کہا ہے کہ وہ ٹریفک ایڈوائزری پر عمل کریں جبکہ کسانوں سے کہا گیا ہے کہ وہ۹؍اور۱۰؍اپریل کو اپنے کھیت کھلیانوں اور باغوں میں تمام آپریشنز معطل رکھیں۔
دریں اثنا وادی کے بیشتر مقامات پر شبانہ درجہ حرارت معمول سے۲سے۴ڈگری سینٹی گریڈ زیادہ ریکارڈ ہوا ہے ۔
وادی کشمیر میں سیاحتی مقام گلمرگ سرد ترین علاقہ رہا ہے جہاں کم، سے کم درجہ حرارت۸ء۲ڈگری سیلسیس ریکارڈ ہوا ہے جبکہ جموں میں بھدرواہ سب سے سرد جگہ رہی ہے جہاں شبانہ درجہ حرارت۰ء۱۰ڈگری سیلسیس ریکارڈ کیا گیا۔