سرینگر کے عید گاہ میں ایک بار پھر نماز عید ادا نہیں کی جائیگی

سرینگر//
جموں کشمیر وقف بورڈ کی چیئر پرسن ‘درخشاں اندرابی نے آج اعلان کیا کہ جاری تعمیراتی کام کی وجہ سے اس سال سرینگر کی تاریخی عیدگاہ میں عید کی نماز ادا نہیں کی جائے گی۔
ایک مقامی خبر رساں ایجنسی سے بات کرتے ہوئے اندرابی نے کہا کہ جموں و کشمیر بھر میں حضرت بل درگاہ اور دیگر آستانوں، مساجد میں باجماعت نماز کے انتظامات کیے گئے ہیں۔’’ سب سے بڑا اجتماع حضرت بل کے مزار پر ہوگا۔ وقف بورڈ کی جانب سے متعلقہ محکموں کے تعاون سے تمام انتظامات مکمل کر لئے گئے ہیں‘‘۔
سرینگر کی عیدگاہ روایتی طور پر عید کے بڑے اجتماعات کا مرکزی مقام رہی ہے۔ تاہم، حالیہ برسوں میں، یہ اجتماعات سیکورٹی خدشات اور خراب موسمی حالات کی وجہ سے متاثر ہوئے ہیں۔
اس سے پہلے انجمن اوقاف جامع مسجد سرینگر نے اعلان کیا تھا کہ اسلامی تعلیمات اور روایات کے مطابق عید الفطر کی اجتماعی نماز عیدگاہ سرینگر میں صبح۱۰بجے ادا کی جائے گی ۔
انجمن کے بیان میں کہا گیا تھا کہ نماز عید سے قبل۹بجے سے میرواعظ کشمیر مولوی محمد عمرفاروق پیغام عید پر روشنی ڈالیں گے ۔’’ عوام الناس سے گزارش کی گئی ہے کہ وہ میرواعظ کے مواعظ حسنہ اور خطاب سے استفادہ حاصل کرنے اور اجتماعی نماز میں شامل ہونے کے لئے بروقت عیدگاہ پہنچنے کی کوشش کریں‘‘۔
انجمن نے امید ظاہر کی ہے کہ حکام نمازِ عید کی پرامن طور پر ادائیگی اور خوش اسلوبی سے انعقاد میں کسی قسم کی مداخلت یا رکاوٹ نہیں ڈالیں گے اور لوگوں کے دینی جذبات اور حقوق کا احترام کریں گے ۔
انجمن نے یہ بات زور دے کر کہی تھی کہ شبِ قدر اور جمعتہ الوداع کے مواقع پر جس طرح نماز کی ادائیگی پر قدغن لگائی گئی تھی، جس سے عوام میں شدید غم و غصہ اور رنج و الم پیدا ہوا، ویسا افسوسناک طرز عمل عید الفطرکے مقدس موقع پر دہرایا نہ جائے ۔
اس دوران سربراہ انجمن میرواعظ کشمیر نے عید کی نماز کے تعلق سے تاریخی عیدگاہ سرینگر کا دورہ کر کے موقع پر انتظامات اور میدان کی حالت کا جائزہ لیا۔ معائنے کے بعد انہوں نے اطمینان کا اظہار کیا کہ موجودہ خشک موسم کے پیشِ نظر عید کی اجتماعِ نماز بخوبی ادا کی جا سکتی ہے ۔
انجمن نے جموں و کشمیر وقف بورڈ پر زور دیا ہے کہ اس موقع پر تمام لازمی انتظامات کو یقینی بنایا جائے ۔ ساتھ ہی عوام سے گزارش کی گئی ہے کہ عید کی نماز میں بڑی تعداد میں شرکت کرکے ملی اجتماعیت ، وحدت اور نظم و ضبط کا مظاہرہ کریں اورعید کی نماز کیلئے اپنی جائے نماز ساتھ لے کر آئیں۔
خراب موسم کی صورت میں عید الفطر کی نمازجامع مسجدسرینگر میں طے شدہ پروگرام کے مطابق ادا کی جائیگی۔