کولگام میں ٹرک نے کمسن بچی کو کچل ڈالا

سرینگر//
جنوبی ضلع کولگام کے پیر بل فرصل گاوں میں جمعے کی صبح ایک تیز رفتار ٹرک نے تین سالہ بچی کو ٹکر ماری جس کے نتیجے میں اس کی برسر موقع ہی موت ہوگئی ۔
اطلاعات کے مطابق کولگام کے پیر بل فرصل گاوں میں جمعے کی صبح اس وقت سراسیمگی دوڑ گئی جب تیز رفتار ٹرک نے تین سالہ بچی کو ٹکر ماری ۔
معلوم ہوا ہے کہ آس پاس موجود لوگوں نے کمسن بچی کو علاج ومعالجہ کی خاطر نزدیکی ہسپتال منتقل کیا جہاں ڈاکٹروں نے اسے مردہ قرار دیا۔
کمسن بچی کی شناخت زینب جنید دختر جنید احمد صوفی ساکن فرصل کے بطور ہوئی ہے ۔
ذرائع نے بتایا کہ پولیس ٹیم فوری طورپر جائے موقع پر پہنچی اور ٹرک ڈرائیور کو دھر دبوچ کر سلاخوں کے پیچھے دھکیل دیا۔