انڈیا الائنس اپنے خاندان کے افراد کو اقتدار میں لانے کیلئے بنا تھا:ترون چگ

جموں//
بی جے پی کے قومی جنرل سکریٹری اور انچارج جموں وکشمیر ترون چگ کا کہنا ہے کہ انڈیا الائنس کو ملک کے عوام نے زور دار جھٹکا دیا ہے ۔انہوں نے ساتھ ہی کہا’’یہ الائنس اپنے برشٹاچار، دھوکہ دہی اور اپنے خاندان کے افراد کو اقتدار میں لانے کے لئے بنا تھا‘‘۔
عام آدمی پارٹی کو ہدف تنقید بناتے ہوئے ان کا کہنا تھا کہ اس پارٹی کا کنبہ بھی بکھر گیا ہے اور پنجاب میں بھی اس کی الٹی گنتی شروع ہوئی ہے ۔
بی جے پی جنرل سکریٹری نے ان باتوں کا اظہار منگل کو یہاں ایک تقریب کے حاشیہ پر نامہ نگاروں کے ساتھ بات کرنے کے دوران کیا۔
چگ نے کہا’’انڈیا الائنس نے گذشتہ سات دہائیوں کے دوران ایک دوسرے کے خلاف الیکشن لڑے ، یہ الائنس اپنے برشٹاچار، دھوکہ دہی اور اپنے بچوں کو اقتدار میں لانے کیلئے بنا تھا‘‘۔ان کا کہنا تھا’’اس کی کوئی آئیڈیالوجی نہیں ہے اور نہ ہی ملک ان کے لئے اہم ہے بلکہ ان کے لئے یہ اہم ہے کہ اپنے بچوں کو کس طرح اقتدار میں لایا جائے ، ملک کے لوگوں نے اس کو جھٹکا دیا ہے ‘‘۔
بی جے پی جنرل سیکریٹری نے کہا کہ مہارشٹرا، ہریانہ اور جموں کشمیر میں بی جے پی کو ایک لاکھ ۴۶ہزار سے زیادہ ووٹ دے کر لوگوں نے اس الائنس کو رد کیا ہے ۔انہوں نے کہا کہ دلی کے اندر بھی لوگوں نے اس الائنس کو رد کیا ہے اور الائنس کے ارکین کو یہ سمجھ آیا ہے کہ کانگریس الائنس کے لیڈروں کو ہی ختم کر رہی ہے ۔
عام آدمی پارٹی کے بارے میں پوچھے جانے پر ان کا کہنا تھا’’عام آدمی پارٹی کا کنبہ بکھر گیا ہے کیونکہ اس پارٹی کے لیڈروں نے کیجروال کا ساتھ دینا چھوڑ دیا ہے ۔چگ نے کہا کہ دلی کو عام آدمی پارٹی سے چھٹکارا ملا ہے اور مجھے یقین ہے کہ پنجاب کو بھی اس سے جلد ہی نجات ملے گی۔
بی جے پی جنرل سیکریٹری نے کہا’’پنجاب میں بھی عام آدمی پارٹی کی الٹی گنتی شروع ہوئی ہے جو اب رکنے والی نہیں ہے ‘‘۔
التجا مفتی کے دو پی ایس اوز کی معطلی کے بارے میں پوچھے جانے پر ان کا کہنا تھا’’مجھے اس واقعے کی جانکاری نہیں ہے تاہم کسی لیڈرکے ساتھ ایسا نہیں ہونا چاہئے اور قصور وار کے خلاف کارروائی ہونی چاہئے‘‘۔
ریاستی درجے کی بحالی کے متعلق پوچھے جانے والے ایک سوال کے جواب میں جنرل سکریٹری کا کہنا تھا’’جب وزیر اعظم اور وزیر داخلہ نے اس کی بحالی کا وعدہ کیا ہے تو وہ ضرور پورا ہوگا‘‘۔انہوں نے کہا کہ عمر عبداللہ کو اس پر سیاست کرنے کے بجائے وہ وعدے پورے کرنے چاہئیں جو انہوں نے جموں وکشمیر کے لوگوں کے ساتھ کئے ہیں۔ان کا کہنا تھا کہ بی جے پی لوگوں کے ساتھ کئے گئے وعدوں کو پورا کرنے کیلئے وعدہ بند ہے ۔