کرن نگر میں کورئیر کمپنی کے ذریعے منتقل کی جانے والی منشیات ضبط:پولیس

سرینگر//
پولیس کا کہنا ہے کہ سرینگر کے کرن نگر علاقے میں منشیات کی غیر قانونی اسمگلنگ کے خلاف ایک کارروائی میں منشیات کی ایک بڑی کھیپ کو ضبط کیا گیا ہے جسے کورئیر سروس کے ذریعے منتقل کیا جا رہا تھا۔
پولیس نے کہا کہ یہ کارروائی چوٹہ بازار میں واقع شری ماروتی کورئیر سروس کے احاطے میں انجام دی گئی۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ قابل اعتماد اطلاع پر کارروائی کرتے ہوئے قانونی طریقہ کار کی پیروی کے بعد ایک کورئیر دفتر کی تلاشی لی گئی اور اس دوران کافی مقدار میں غیر قانونی منشیات برآمد کی گئی۔
پولیس نے کہا کہ ضبط شدہ منشیات میں میورکس ‘ ٹی کوڈین کی۲۲۰بوتلیں، اسپاسموپروکسیون کے۱۵بکس‘۷سٹرپس فی بکس) اور پریگابالن کے۶۰سٹرپس شامل ہیں۔
بیان میں کہا گیا’’بازیابی کے بعد پولیس اسٹیشن کرن نگر میں ایف آئی آر نمبر۲۰۲۵/۰۱کے تحت ایک مقدمہ درج کیا گیا ہے ‘‘۔
ترجمان نے کہا کہ ضبط کی گئی کھیپ کی اگلی اور گذشتہ سپلائی چین دونوں کا سراغ لگانے کے لیے تحقیقات جاری ہیں۔
پولیس ترجمان نے بتایا کہ سمگلنگ کے اس نیٹ ورک میں ملوث ملزمان کی گرفتاری کیلئے چھاپہ مار کارروائی شروع کر دی گئی ہے ۔انہوں نے مزید کہا کہ پولیس منشیات کی لعنت کو ختم کرنے کے لیے پرعزم ہے اور شہریوں سے تاکید ہے کہ وہ کسی بھی مشکوک سرگرمیوں کی اطلاع دیں تاکہ منشیات سے محفوظ سماج کو یقینی بنایا جا سکے ۔