فوجی کیمپ پر گرینیڈ حملے کا معاملہ:سابق ملی ٹینٹ سمیت تین گرفتار:پولیس

سرینگر//
شمالی ضلع بارہ مولہ میں فوجی کیمپ پر گرینیڈ حملے میں ملوث تین مشتبہ افراد کو پولیس نے حراست میں لینے کا دعویٰ کیا ہے ۔
پولیس کاکہنا ہے کہ۷جنوری کی شام کو ہامرے پٹن علاقے میں۱۶۳ویںٹریٹوریل آرمی کیمپ پر گرینیڈ داغا گیا جو زور دار دھماکہ کے ساتھ پھٹ گیا تاہم اس حملے میں کسی کو چوٹ وغیرہ نہیں آئی۔
پولیس نے معاملے کی نسبت پولیس اسٹیشن پٹن میں کیس درج کرکے تحقیقات شروع کی۔
ایس پی فیروز نے ہفتے کے روز ایک پریس کانفرنس کے دوران جانکاری فراہم کرتے ہوئے بتایا کہ گرینیڈ حملے کے بعد جائے وقوع پر اہم ثبوت و شواہد اکھٹا کئے گئے ۔
پولیس آفیسر نے کہاکہ ٹیکنکل اور ہیومن انٹیلی جنس کو بروئے کا لاکر پولیس نے چوبیس گھنٹوں کے اندراندر تین مشتبہ افراد کو حراست میں لیا۔
فیروز نے دعویٰ کیاکہ گرفتار شدگان کے قبضے سے ایک ہینڈ گرینیڈ ، ایک اے کے رائفل، ایک پستول، ۲۵۶گولیوں کے راونڈ اور۲۱پستول راونڈ برآمد کرکے ضبط کئے گئے ۔
ایس پی نے کہاکہ گرفتار شدگان میں ایک سابق ملی ٹینٹ اور دوسرا سرینڈر ملی ٹینٹ کا بیٹا ہے جبکہ تیسرا مشتبہ شخص گزشتہ دو برسوں سے نارکو ملی ٹینسی کیس میں قانون نافذ کرنے والے ادارے کو مطلوب تھا۔