اننت ناگ میں منشیات سمگلر کی ایک کروڑ رویے مالیت کی جائیداد ضبط

سرینگر//
پولیس نے جنوبی کشمیر کے ضلع اننت ناگ میں ایک منشیات فروش کی این ڈی پی ایس ایکٹ کے تحت قریب ایک کروڑ روپے مالیت کی غیر منقولہ جائیداد کو منسلک کر دیا ہے ۔
ایک پولیس ترجمان نے اپنے ایک بیان میں کہا کہ منشیات کی اسمگلنگ اور اس کے مالیاتی نیٹ ورکس کے خلاف ایک اہم کارروائی کرتے ہوئے اننت ناگ پولیس نے ستکی پورہ کے رہنے والے عبدالغنی ڈار کے بیٹے خورشید احمد ڈار کے دو منزلہ رہائشی مکان کو ضبط کرلیا ہے ۔
ترجمان نے کہا کہ اس جائیداد جو ایک کنال اراضی پر بنائی گئی تھی اور جس کی قیمت تقریباً ایک کروڑ روپے تھی، کو این ڈی پی ایس ایکٹ کی دفعہ ۶۸ایف کے تحت منسلک کیا گیا۔ان کا کہنا ہے کہ اس مکان کو منشیات کی سمگلنگ سے حاصل ہونے والی آمدنی سے تعمیر کیا گیا ہے ۔
بیان میں کہا گیا کہ ملزم پولیس اسٹیشن سری گفوارہ میں ایف آئی آر نمبر۲۰۱۹/۴۷کے تحت درج منشیات کے ایک بڑے کیس میں ملوث ہے ، جس میں کافی مقدار میں ممنوعہ اشیاء کی برآمدگی شامل ہے ۔
پولیس ترجمان نے بتایا کہ یہ فیصلہ کن قدم منشیات کی لعنت کو ختم کرنے اور منشیات کی غیر قانونی تجارت کی حمایت کرنے والے معاشی ڈھانچے کو ختم کرنے کے لیے اننت ناگ پولیس کے عزم کی نشاندہی کرتا ہے نہوں نے کہا کہ اس کارروائی کا مقصد مجرمانہ سرگرمیوں کو روکنا اور معاشرے کو منشیات کے استعمال کے منفی اثرات سے بچانا ہے ۔