پلوامہ میں نامعلوم افراد نے۵۰ سالہ دکاندار پر تیز آب پھینکا

سرینگر//
جنوبی ضلع پلوامہ کے شادی مرگ علاقے میں نامعلوم افراد نے ۵۰سالہ دکاندار پر تیز آب پھینکا جس کے نتیجے میں وہ شدید طورپر زخمی ہوا اور اسے سری نگر منتقل کیا گیا ۔
پولیس نے حملہ آوروں کی بڑے پیمانے پر تلاش شروع کی ہے ۔
اطلاعات کے مطابق جنوبی ضلع پلوامہ کے شادی مرگ علاقے میں منگل کی شام نامعلوم افرادنے ۵۰سالہ محمدشفیع میر ولد محمد محسن میر ساکن قلم پورہ پلوامہ پر تیز آب پھینک کر راہ فرار اختیار کی۔
معلوم ہوا ہے کہ چیخ و پکار کی صدائیں بلند ہونے کے ساتھ ہی آس پاس موجود لوگ جائے موقع پرپہنچے اور انہوں نے محمد شفیع میر کو علاج ومعالجہ کی خاطر نزدیکی ہسپتال منتقل کیا جہاں پر ابتدائی مرہم پٹی کے بعد انہیں سرینگرریفر کیا گیا۔
ذرائع نے بتایا کہ محمد شفیع میر کا چہرہ بری طرح سے جھلس گیا ہے ۔
پولیس ذرائع نے بتایاکہ معاملے کی نسبت راجپورہ پولیس تھانہ میں کیس درج کرکے حملہ آوروں کی بڑے پیمانے پر تلاش شروع کی گئی ہے ۔انہوں نے مزید بتایا کہ سی سی ٹی وی فوٹیج کوکھنگالاجارہا ہے اور بہت جلد ملوثین کو قانون کے کٹہرے میں کھڑا کیاجائے گا۔
دریں اثنا اپنی پارٹی کے سربراہ الطاف بخاری نے پلوامہ میں پیش آئے واقعے کی سخت الفاظ میں مذمت کرتے ہوئے ملوثین کو جلدازجلد سلاخوں کے پیچھے دھکیلنے کامطالبہ کیا ہے ۔
بخاری نے کہاکہ یہ افسوسناک ہے کہ پلوامہ میں ۵۰سالہ شخص پر تیز آب سے حملہ کیا گیا۔انہوں نے کہاکہ وادی کشمیر کو ’پیر ویر‘ہونے کا شرف حاصل تھا لیکن اب جرائم ودیگر پریشان کن واقعات کی وجہ سے اکثر خبروں میں رہتی ہے ۔
اپنی پارٹی کے صدر نے اس گھناؤنے جرم کے مرتکب افرادکو جلدازجلد گرفتار کرنے کامطالبہ کیا۔