جموں میں۷۰فیصد ملازم غیر حاضر ‘نائب وزیر اعلیٰ کی سخت کارروائی کی تنبیہ

جموں//
سرکاری دفاتر میں غیر حاضری کا سخت نوٹس لیتے ہوئے جموں و کشمیر کے نائب وزیر اعلی سریندر کمار چودھری کا کہنا ہے کہ اپنے فرائض میں غفلت برتنے والے ملازمین کے خلاف سخت کارروائی عمل میں لائی جائے گی۔
چودھری نے کہا کہ میں نے پبلک ورکس ڈیپارٹمنٹ کے دورے کے دوران قریب۷۰فیصد ملازموں کو غیر حاضر پایا۔
نائب وزیر اعلیٰ نے ان باتوں کا اظہار جمعرات کو یہاں چیف انجینئر پبلک ورکس ڈیپارٹمنٹ کے دفتر کا اچانک دورہ کرنے کے بعد نامہ نگاروں کے ساتھ بات کرنے کے دوران کیا۔
چودھری نے کہا’’جب میں نے آج یہاں پانامہ چوک میں چیف انجینئر پبلک ورکس ڈیپارٹمنٹ کے دفتر کا دورہ کیا تو میں حیران ہوا کہ وہاں ملازم ہی موجود نہیں تھے جو سینئر افسر ہیں وہ بھی موجود نہیں تھے ‘‘۔
ان کا کہنا تھا کہ’’اس دفتر میں۷۰فیصد ملازم موجود نہیں تھے ‘‘۔
چودھری نے کہا’’ہم عوام کے نمائندے ہیں اور ہمیں عوام نے منتخب کیا ہے پہلے کی حکمرانی ختم ہو چکی ہے اور اب عوام کی حکمرانی ہے جمہوریت کی حکمرانی ہے ‘‘۔
نائب وزیر اعلیٰ نے کہا کہ احتساب اور کارکردگی کو یقینی بنانے کے لئے مختلف سرکاری محکموں میں اس طرح کے اچانک دورے کئے جائیں گے ۔ان کا کہنا تھا’’ایسا لگتا ہے ہمیں ہر سرکاری دفتر میں جانا ہوگا‘‘۔
چودھری نے کہا کہ ہم غریبوں کے پیسوں کو ضائع نہیں ہونے دیں گے ۔انہوں نے کہا’’وزیر اعلیٰ عمر صاحب کی بھی ہدایات ہیں کہ ہم لوگوں تک پہنچیں اور جو بھی سہولیات ہیں ان کی فراہمی کو یقینی بنائیں۔‘‘
ادھر ایک سرکاری بیان میں کہا گیا ہے کہ نائب وزیر اعلیٰ سریندر کمار چودھری نے چیف اِنجینئرپی ڈبلیو ڈی( آر اینڈ بی) جموں کے دفتر اور گورنمنٹ ہسپتال گاندھی نگر کا اچانک معائینہ کیا۔
نائب وزیر اعلیٰ نے وہاں موجود عملے سے بات چیت کرتے ہوئے کہا کہ حکومت لوگوں کو عوامی خدمات کی تیز تر اور پریشانی کے بغیر فراہمی کو یقینی بنانے کے لئے پُرعزم ہے۔ اُنہوں نے اَفسران سے کہا کہ وہ اِس بات کو یقینی بنائیں کہ لوگوں کو اِن کے لئے دِی گئی سہولیات سے اِستفادہ کرتے ہوئے کسی قسم کی تکلیف کا سامنا نہ کرنا پڑے۔
اُنہوں نے ہسپتال اِنتظامیہ کو ہدایت دی کہ مریضوں کو معیاری طبی سہولیات کی فراہمی کو یقینی بنایا جائے۔ اُنہوں نے کہا کہ اِس بات کو یقینی بنایا جائے کہ صحت سے متعلق پالیسیوں کے فوائد اُنہیںبغیر کسی رُکاوٹ کے فراہم کئے جائیں۔
بعد ازاں، متعدد وفود سول سیکرٹریٹ میں نائب وزیر اعلیٰ سے ملاقی ہوئے اور اُنہیں اَپنے مسائل سے آگاہ کیا۔
سیکرٹریٹ ملازمین کے ایک وفد نے خدمات سے متعلق متعدد مسائل اُٹھائے اور ان کے اَزالے کا مطالبہ کیا۔ پی ایم پیکیج کے اُمیدواروں کی ڈیپوٹیشن نے زُمرہ کی اَسامیوں کی ڈِی ریزرویشن کے مسئلے کو اُجاگر کیا۔
اِسی طرح رام بن، راجوری، ڈوڈہ اور کٹھوعہ کے وفود نے اَپنے اَپنے علاقوں کی ترقی سے متعلق مسائل کو پیش کئے۔
نائب وزیر اعلیٰ نے وفود کے ساتھ بات چیت کرتے ہوئے یقین دِلایا کہ اُن کی طرف سے پیش کئے گئے مسائل کو بروقت اور مناسب حل کے لئے دیکھا جائے گا۔