جموں شوٹ آؤٹ میں ملوث دو بد معاش گرفتار’پستول برآمد:پولیس

جموں//
جموں پولیس نے شوٹ آؤٹ میں ملوث دو بد معاشوں کی گرفتاری عمل میں لا کر ان کے قبضے سے پستول اور گولیوں کے راؤنڈ برآمد کئے ۔
ایس پی جموں رولر برجیش کمار شرما نے ایک پریس کانفرنس کے دوران کہا کہ ۲؍اور ۳نومبر کی درمیانی شب نکی طوی میں نامعلوم افراد نے عمران خلیل ساکن گوجر نگر پر فائرنگ کی جس کے نتیجے میں وہ شدید طورپر زخمی ہوا اور اس کو ہسپتال منتقل کیا گیا۔
شرمانے کہاکہ فائرنگ کے اس واقعے میں ملوث دو افراد کی گرفتاری عمل میں لائی گئی اور ان میں سے ایک بد زمانہ منشیات فروش ہے اوراس کے خلاف متعدد کیس بھی درج ہیں۔
ایس پی نے مزید بتایا کہ فائرنگ کا واقع پیش آنے کے بعد پولیس نے تحقیقات شروع کی اور کئی ٹیموں کو تشکیل دیا گیا ۔
شرما کا کہنا ہے کہ سی سی ٹی وی فوٹیج کو کھنگالنے کے بعد پولیس نے محمد حسین کھٹانہ اور محمد رمضان کو طوی برج کے نزدیک گرفتار کیا ۔ان کے مطابق گرفتار شدگان کے قبضے سے اٹھارہ گرام ہیروئن برآمد کی گئی اور پوچھ تاچھ کے دوران دونوں نے شوٹ آوٹ میں ملوث ہونے کا اعتراف کیا۔
ایس پی نے مزید بتایا کہ گرفتار شدگان کے قبضے سے پستول اور۱۶گولیوں کے راونڈ بھی برآمد کرکے ضبط کئے گئے ۔
پولیس آفسیر کا کہنا ہے کہ رمضان نامی منشیات فروش پولیس کو نو کیسوں میں انتہائی مطلوب ہے اور وہ مویشی اسمگلنگ کیسوں میں بھی ملوث رہا ہے ۔