بالائی حصوں میں دوسرے روز بھی ہلکی برفباری‘میدانی علاقوں میں موسم بہتر

سرینگر/۱/
کشمیر کے کچھ بالائی علاقوں میں وقفے وقفے سے ہلکی برفباری کا سلسلہ جاری ہے جس کے نتیجے میں وادی کے بالائی علاقوں میں اہم راستے بند ہو گئے ہیں۔
میدانی علاقوں میں بارشوں کے بعد منگل کو موسمی صورتحال میں بہتری واقع ہوئی۔
عہدیداروں نے بتایا کہ کشمیر میں موسم کی پہلی برفباری ، جو پیر کو شروع ہوئی تھی ، رات کے وقت بھی کئی مقامات پر جاری رہی۔انہوں نے بتایا کہ گلمرگ اور سونمرگ سیاحتی مقامات کے بالائی علاقوں سے برفباری کی اطلاعات موصول ہوئی ہیں۔
کپواڑہ اور بانڈی پورہ اضلاع کے کچھ حصوں میں بھی برفباری ہوئی۔
عہدیداروں نے بتایا کہ برفباری کی وجہ سے سرینگر لیہہ قومی شاہراہ اور وادی کے اونچے علاقوں میں دیگر اہم راستوں کو عارضی طور پر بند کردیا گیا ہے۔انہوں نے بتایا کہ بارڈر روڈآرگنائزیشن سمیت حکام نے آج صبح برف ہٹانے کے لیے اپنے جوانوں اور مشینری کو کام پر لگایا۔
سیاحتی مقام گلمرگ میں کم سے کم درجہ حرارت منفی۲ء۱ڈگری سینٹی گریڈ ریکارڈ کیا گیا جہاں گذشتہ چوبیس گھنٹوں کے دوران۶ء۱۱ملی کیٹر بارش ریکارڈ ہوئی ہے ۔
سرینگر میں گذشتہ چوبیس گھنٹوں کے دوران ۶ء۸ملی میٹر بارش ریکارڈ ہوئی ہے جبکہ پہلگام میں۴ء۱۳ملی میٹر اور سرحدی ضلع کپوارہ میں۰ء۱۲ملی میٹر بارش ریکارڈ ہوئی ہے ۔
محکمہ موسمیات کے مطابق وادی میں۲۳نومبر تک بڑے پیمانے پر موسم خراب ہونے کا کوئی امکان نہیں ہے ۔
ایک ترجمان کے مطابق وادی میں۱۲سے۱۴ نومبر تک موسم مجموعی طور پر خشک رہنے کا امکان ہے ۔انہوں نے کہا کہ بعد ازاں۱۵؍اور۱۶نومبر کو ایک اور کمزور مغربی ہوا وادی میں داخل ہوسکتی ہے جس کے نتیجے میں شمالی کشمیر اور وسطی کشمیر کے کچھ پہاڑی علاقوں معمولی برف باری ہوسکتی ہے ۔
ان کا کہنا تھا کہ وادی میں۲۳نومبر تک موسم میں کسی بڑی تبدیلی کا کوئی امکان نہیں ہے ۔
محکمے نے اپنی ایڈوائزری میں کہا کہ وادی کے میدانی علاقوں میں صبح اور شام کے وقت ہلکی دھند چھائی رہ سکتی ہے لہذا سفر کرنے والوں سے احتیاط سے گاڑیاں چلانے کی صلاح دی جاتی ہے ۔
ان کا کہنا تھا کہ وادی میں فصل کٹائی کا کام لگ بھگ مکمل ہوچکا ہے اگر کہیں باقی ہے تو وہ یہ کام جاری رکھ سکتے ہیں۔